DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial JdCG, tanba komete krime Ofensa Integridade Fisika Simples hasoru lezadu ho inisial JBSdRdC.
Antes atu hahu julgamentu Juiz prosesu Ana Paula deklara katak, krime neebe akuza ba iha arguidu ho nia natureza semi publiku, tanba nee lei fo dalan atu dada fila kuandu lezadu ba iha prosesu aseita.
Iha sala julgamentu laran Tribunal konfirma ba iha lezadu no lezadu deklara katak, perdua arguidu no husu atu dada fila prosesu arguidu, ho razaun katak sira nain rua servisu iha Instituisaun PNTL no F-FDTL atu ba futuru labele kria tan problema seluk.
Tribunal konfirma ba iha arguidu, no arguidu mos deklara katak, arepende ona nia hahalok nee, promete iha futuru sei la halo tan.
Rona tiha arguidu no lezadu, Juiz prosesu fo hanoin ba iha arguidu katak, aktu arguidu nian kuandu lezadu la aseita dada fila julgamentu lao ba oin, desizaun Tribunal nian notifika arguidu nia superior bele afeta ba arguidu nia servisu hanesan transferensia, no deviza.
Tanba nee Tribunal husu ba arguidu, atu iha futuru halao servisu ho professional atu labele hamosu tan problema hanesan nee ba ema seluk.
Rona tiha Tribunal, husi parte Ministeriu Publiku no Defeza, husu atu homologa prosesu nee.
No ikus mai, Tribunal deside homologa prosesu nee, no absolve arguidu husi instansia. Arguidu no lezadu mos kaer liman, no hakuak malu iha autor judisiariu sira nia oin.
Tuir akuzasaun katak, arguidu JdCG nudar membru polisia tranzitu Dili.
Iha loron 11/02/2023 maiz ou menus tuku 20h45 OTL, arguidu halao nia knaar iha postu Polisia tranzitu Bairru Pite, Dili.
Iha tempu neeba, lezadu konduz nia motor liu husi Postu Polisia Tranzitu Bairru Pite no arguidu hakilar uluk lezadu ho liafuan “oi”.
Ho arguidu nia liafuan hakilar refere, lezadu hanoin nia kolega maka bolu, tamba nee, lezadu volta nia motor hodi ba fali Postu Polisia Tranzitu nian.
Bainhira too iha Postu Polisia Tranzitu nian, arguidu hatete ba lezadu atu tula fali lezadu nia motor ba edifisiu Polisia nian, ho razaun katak, lezadu uza motor kanu resi hodi kontra kodigu ba estrada.
Lezadu la konkorda ho arguidu nia atuasaun refere tanba nee, mosu diskute malu entre lezadu ho arguidu.
Husi diskute malu nee, arguidu hirus hodi silu lezadu nia liman ba kotuk no rasta lezadu husi motor leten too lezadu monu ba rai.
Hafoin nunee, arguidu kaer no lezadu hodi riba ha alkatraun leten.
Bainhira lezadu monu tiha iha rai, arguidu kontinua lori ain sama no tebe tan lezadu nia ulun iha rai.
Konsekuensia direta no nesesariu hasi arguidu nia asaun refere, rezulta lezadu sofre kanek iha ain tuur, liman no moras iha isin lolon ka saude.
Arguidu halo nia hahalok refere ba lezadu ho konsiente, libre deliberada, hatene katak, silu lezadu nia liman no riba lezadu ba rai depois sama no tebe tan lezadu nia ulun iha rai hanesan meus ida, hodi ofende lezadu nia integridade fizika ka saude neebe lei proteze.
Arguidu hatene katak, nia asaun silu, riba ba rai, sama no tabe tan depois de monu tiha nudar asaun krime neebe lei bandu maibe halo nafatin.
Tanba nee konstitui arguidu nudar autor material ho forma konsumada ba krime ofensas ha integridade fizika simples, tuir artigu 145/1 Kodigu Penal.
Audensia julgamentu nee, prezide husi Juiz Ana Paula, Ministeriu Publiku reprezenta husi Prokurador, Antonio Tavares, arguidu hetan asistensia legal husi Defensor Publiku, Anselmo Akara.
Jornalista: Terezinha De Deus
Editora: Carme Ximenes
