DILI, STLTIMORLESTE.com – Tribunal Judisial Primeira Instansia Dili (TJPID) liu husi leitura akordaun deside aplika pena prizaun tinan 10 ba arguidu ho inisial AdD.
Iha desizaun nee Tribunal hare katak, arguidu nia aktu prense duni ba krime neebe iha, maibe Tribunal tetu ho sirkunstansia sira hotu, no ikus mai Tribunal desidi hodi aplika pena prizaun tinan 10 ba arguidu.
Tuir Defeza arguidu nian, Fernando da Costa katak, nia parte la halo rekursu hasoru desizaun Tribunal nian.
“Tribunal aplika tinan 10, kazu nee Homesidu Simples nia modura nee husi tinan 8 too tinan 20, no Ministeriu Publiku husu atu aplika tuir modura pena neebe iha, no hau husu Tribunal atu aplika pena husi tinan 8 mai kraik,” dehan Fernando ba STL, iha Kaikoli, Dili, Kuarta ( 29/10/2025).
Nia dehan, Tribunal aplika tinan 10 ida nee sufisiente ona, no nia parte esklarese ona ba iha familia arguidu nian, tanba nee familia mos aseita ho desizaun Tribunal, no aseita mos la halo rekursu hasoru desizaun nee.
Tanba kazu nee Homesidu Simples akontese direta kedan, no arguidu mos konfesa sem rezerva no sei la halo tan rekursu.
Antes nee iha alegasaun Prokurador Nelson Magno, husu Tribunal atu aplika pena Prizaun ba iha arguidu. Enkuantu parte Defeza, Advogadu Fernando da Costa husu Tribunal, atu kondena arguidu ho pena prizaun menus husi tinan walu, tanba arguidu konfesa imparsial ba faktus.
Tuir faktus katak, iha loron, 28 fulan fevereiro tinan 2025 por volta 8h00 dader, fatin iha Beduku, Tibar Liquisa vitima Isac Soares hanesan chefe ekipa halo moru kompanha Joni Ze, duun ba arguidu naok teen no tolok nia inan aman.
Arguidu ho vitima diskute malu hodi hadau malu besi ulir no arguidu mak foti duni besi hodi baku dala ida iha vitima nia ulun hetan kanek no monu ba rai, arguidu mos halai husi fatin akontesimentu nee.
Testemunha Joni Soares, haree ema halai, tanba nee nia mos ba iha fatin akontesimentu hodi haree vitima monu hela ba rai hetan kanek ulun no mos rai sai, tanba nee mak sira hein ambulansia hodi mai foti vitima ba iha Ospital, maibe labele salva nia vida.
Konsekuensia husi arguidu baku nee halo vitima hetan kanek grave iha ulun, halo raan sai barak hodi kauza lakon vida.
Arguidu halo agresaun hasoru vitima, tanba vitima dun nia naok teen no tolok nia inan aman.
Arguidu hatene katak bainhira lori besi baku vitima nia ulun bele kauza kanek grave no raan sai barak hodi rezulta nia mate. Maibe arguidu halo nafatin saida mak nia hakarak.
Arguidu halo krime ho livre, deliberada, konsentemente no hatene katak hahalok nee proibidu no hetan pena tuir lei tanba nee konsidera arguidu hanesan autor material ba krime omisidiu simples previstu tuir artigu 138 husi kodigu penal.
Audensia julgamentu nee, prezide husi Juiz, Fransisca Cabral, Jose Escurial, Juiz estajiadu nain ida, Ministeriu Publiku reprezenta husi Prokurador, Nelson Magno, arguidu hetan asistensia legal husi Advogadu Privadu, Fernando de Carvalho.
Jornalista: Terezinha De Deus
Editora: Carme Ximenes
