LAUTEM, STLTIMORLESTE.com – Primeiru Ministru (PM) Kay Rala Xanana Gusmão hatuur fatuk dahuluk ba projetu rehabilitasaun estrada hosi rotunda Lautem ba Com, Munisipiu Lautem.
Lansamentu konstrusaun estrada nee halao iha loron Kinta Feira (30/10/2025).
Liu husi Primeiru-Ministru (PM) esplika ba populasaun Lautem katak, lansamentu projetu rehabilitasaun estrada nee mak hanaran infraestrutura bazika neebe hola parte iha Planu Estratejiku Dezenvolvimentu Nasional 2011-2030.
PEDN nee define katak, infraestruturas bazikas mak sai hanesan baze ba dezenvolvimentu. Ida nee klasifika tiha ona ba estrada nasionais, estrada rejionais, estradas lokais no estrada rurais.
“Ohin hau mai iha-nee tanba hakarak atu ita hotu liu-liu komunidade Lautem asiste serimónia asinatura kontratu ho kompañia, ita sai sasin atu nia bele halo ho di’ak no kualidade,” hateten Xanana liu husi nota komunikadu imprensa neebe STL asesu husi Media Gabinete Primeiru-Ministru iha Sesta (31/10/2025)
Xefe Governu hakarak husu ba komunidade tomak iha nee hodi koopera ho kompania, tanba ida-nee sei halo duni ba komunidade. Husu labele halo impedimentu, nunee bele servisu ho lalais, kualidade no finaliza tuir tempu neebe determina ona.
“Ami mai hotu iha nee, hau kontente tebes tanba ama ferik sira ho katuas sira barak sei iha hela. Sira nee mak luta nain liu hosi terus oioin durante tinan 24 hodi ita hetan independensia. Tanba nee, ita halo dezenvolvimentu nee atu ba sira. Kualker se mak sai boot atu ukun iha obrrigasaun atu halo diak ba rai nee hodi selu sira-nia sakrifísiu,” Xefe Governu haktuir.
Iha fatin hanesan, Ministru Obras Publikas (MOP), Samuel Marçal agradese ba ekipa tomak husi Ministeriu Obras Publikas no Ministeriu ho diresaun relevante sira mak servisu hamutuk too ohin loron bele halibur ema hotu iha fatin ida-nee atu halo lansamentu fatuk da-huluk.
Husu mos ba ema hotu-hotu atu kolabora didiak, nunee kompañia bele finaliza projetu nee ho diak, kualidade no tuir tempu neebe iha ona.
Iha fatin nee Ministru Obras Publikas asina kontratu ho kompañia, no asiste direta hosi Primeiru-Ministru, ministru sira, autoridade munisipal, autoridade lokal, veteranus, sosiedade sivil, joven, estudante no populasaun hodi hatudu katak, osan nee povu nian tenke jere ho diak.
Nunee mos Prezidente Autoridade Munisipiu (PAM) Lautem, Mélio de Jesus agradese ba Primeiru-Ministru, Kay rala Xanana Gusmão neebe servisu makaas hodi realiza duni serimonia hatuur fatuk da-huluk ba projetu rehabilitasaun estrada ida-nee.
Iha fatin nee nia deklara hodi povu Lautem nia naran katak, sei koopera ho didiak ho kompania atu halo duni estrada neebe populasuan hein durante tinan barak nia laran.
Projetu rehabilitasaun estrada Lautem ba Com nee ho nia sesaun STA 182+040-STA.201+800 (19.760 Km) ho montante orsamentu $11, 213, 813.30 neebe superviziona husi Ministeriu Obras Públikas.
Durasaun servisu durante loron 365 ho numeru kontratu: TENDER/175/MOP/2024, responsabiliza husi SHA SNXI Construction engineering Group Coorporation Limited (China).
Partisipa iha serimonia lansamentu nee asiste direta husi Vise-Primeiru-Ministru, Ministru Koordenador Asuntus Sosiais no Ministru Dezenvolvimentu Rural no Abitasaun Komunitaria, Mariano Assanami Sabino, ho membru governu sira, autoridade munisipal, autoridade lokal, veteranus, sosiedade sivil, joven, estudante no populasaun.
(alb)
