BAUKAU, STLTIMORLESTE.com – Engarrafamentu neebe kontinua akontese iha Merkadu Munisipal Baukau, tanba laiha ema atu organiza negosiante sira neebe faan sasan okupa estrada.
“Merkadu kondisaun iha neeba nee ita hotu hatene, ita lalika taka kondisaun reel mak ida nee duni, kestaun ba ita mak nee Prezidente se mak atu orienta se para sae ba Domingo no Kinta feira halo normalizasaun movimentu komersiu too agora hau la komprende se mak atu orienta se,” Sekretariu Munisipal Planeamentu Investimentu No Dezenvolvimentu (PIDI), Eduardo Filipe Ximenes hateten iha Enkontru Konselhu Koordenasaun Munisipiu neebe realiza iha salaun apuramentu Baukau, Kinta (30/10/2025).
Nia sublina, Xefe Departementu Jestaun Merkadu iha estrutura Autoridade Munisipiu Baukau troka ona ba dala 3, maibe merkadu Munisipal Baukau kontinua dezorganizadu, tanba negosiante neebe faan iha merkadu Munisipal Baukau ba loron Kinta no Domingo kontinua faan okupa estrada hodi hamosu engarrafamentu no seluk mak negosiante balu faan fali iha area rotunda Vila Nova, maibe laiha ema atu kontrola.
“Xefe Departementu nee ita troka dala 3 ona, hasai tiha Senhor Mario tau Senhor Sebastião, Sebastião sai tiha ida fali mai tan mos la lao nafatin, tanba nee hau la hatene, todan nee iha neebe, iha hau ga, iha Prezidente ga, iha Diretor ga ita sira nee,” Eduardo komenta.
Nia katak, tuir loloos movimentu transporte tama sai iha merkadu Munisipal Baukau laiha engarrafamentu, maibe laiha dirijente ida iha merkadu refere atu diriji negosiante ida hatun sasan iha fatin faan neebe prepara ona iha merkadu Munisipal Baukau, tanba engarrafamentu nee mosu negosiante sira hatun sasan iha estrada no kontinua faan iha estrada, nunee hamosu engarrafamentu.
“Se laiha ema ida atu aranja ema sira nee signifika hatun iha neebe nia tau buat ruma iha neeba faan daudauk ona ida nee mak sai kauza ba movimentu transporte nee,” Eduardo tenik.
Nia rekonhese, merkadu Munisipal Baukau atualmente laiha terminal ba transporte sira atu para hodi hatun no tula pasajeiru no sasan sira, maibe iha fatin atu transporte sira hatun negosiante sira nia sasan hafoin karreta bele halai sai, tanba la autoriza atu karreta ida hatun tiha negosiante para permanente iha merkadu laran.
“Karreta labele para iha neeba maibe agora daudauk karrera para fali iha laran se mak atu halo funsionamentu ida nee, se mak bele sae ba hateten mai faan deit, karreta labele para iha nee, se karreta para, karreta sira tama nee hanusa, ida nee mak too agora hau bingung, seraque DNTT mak atu halo funsionamentu ida nee ga ou Jestaun Merkadu,” Eduardo katak.
Hatan ba kestaun nee, Prezidente Konselhu Koordenasaun Munisipiu, Veneranda Lemos hateten, sei halo koordenasaun ho parte Polisia Tranzitu Munisipiu Baukau nunee bele ajuda hodi normaliza transporte tama sai iha merkadu Munisipal Baukau liu liu tempu bazar loron Kinta no Domingo.
“Sei fo hatene ba tranzitu ajuda haree karreta sira nee sai, lae ita boot sira fase liman tiha husik fali deit ba jestaun merkadu, ita boot sira mos iha obrigasaun atu kontrola karreta sira tama sai iha merkadu laran, saida mak PIDI koalia nee razaun duni konaba transporte se mak atu ba normaliza, se ita hateten ida nee ida neeba laos hau nia servisu nee lae, saida mak iha ita nia matan laran ida nee mak ita halo,” katak Veneranda.
Tuir nia katak, Baukau atu lao ba oin ema hotu nia responsabilidade nunee husu Diresaun Nasional Transporte Terrestre Munisipiu Baukau no Jestaun Merkadu atu haree asuntu refere hafoin hein ajuda husi Polisia Tranzitu normaliza movimentu transporte iha merkadu refere.
Jornalista: Tomas Reis
Editora: Carme Ximenes
