DILI, STLTIMORLESTE.com – Merkadu Taibesi nakonu ho negosiantes no konsumidor sira, tanba nee negosiantes kontente bele hetan rendimentu diak iha loron finadu.
Negosiante modo iha Taibesi, Julia Moniz da Costa dehan, ohin loron konsumidor sira barak mak mai sosa modo iha merkadu Taibesi, hanesan agora daudaun lao ba mai deit iha merkadu laran la diak, tanba ohin ema barak mai faan sira nian sasan iha merkadu ida nee.
“Ohin loron ami hetan rendimentu diak iha loron finadu, tanba loron baibain ami hetan US$10 ba leten deit, maibe ohin loron too oras ida nee ami hetan rendimentu US$ 40 resin ona, tanba ami faan ho katupa, dulas nuu, modo mutin, tomati, koto nurak no modo seluk tan, hanesan ita boot sira haree merkadu laran ita lao ba mai deit mos la diak, maske loron manas maibe merkadu Taibesi nakonu ho ema,” afirma Julia ba jornalista STL iha merkadu Taibesi, Sabadu nee (01/11/2025).
Nunee mos Rosito Mendes hanesan negosiante husi MunisÃpiu Likisa dehan, ohin dader sai husi Likisa mai merkadu tuku 06:00, lori malus, hudi, aidila, katupa mai faan iha merkadu Taibesi, loraik fila fali ba Likisa.
“Ami mai faan sasan aluga ema nian anguna, malus nee ami faan tolu US$ 1, tanba ami sosa tutan husi ema mak lori mai faan fali, depois ami aluga tan ema nian kareta anguna, aidila tasak nee ida ami faan US$ 2,” tenik nia.
Jornalista: Jacinta Sequeira
Editor: Xisto Mendonça
