DILI, STLTIMORLESTE.com – Prezidente Republika (PR), Jose Ramos Horta hatoo sentidu kondolensia ba Sua Majestade Liurai Feto Sirikit Inan Liurai Feto.
Prezidente no Laureadu Nobel ba Pas, Jose Ramos Horta hatoo ninia tristeza profunda ba falesimentu Sua Majestade Liurai feto Sirikit, Inan Liurai feto Tailandia nian.
Iha loron Sabadu (01/11/2025) Prezidente Ramos Horta haruka ona mensajen kondolensia formal ida ba Sua Majestade Liurai Maha Vajiralongkorn, Família Real no povu Reinu Tailandia nian, hodi hatoo simpatia no solidariedade profunda husi povu Timor Leste.
Iha nia mensajen formal, Prezidente Ramos Horta hateten, “Sua Majestade Liurai feto Sirikit Inan Liurai feto sei hanoin hikas laos de’it ba ninia prezensa no elegsnsia nobre, maibe liu-liu ba ninia kompromisu neebe la kole atu hadia moris diak komunidade rural sira nian, fo kbiit ba feto sira no prezerva arte no tradisaun kultural Tailandia nian, no mos ba ninia papel maternal nuudar fonte inspirasaun no unidade ba nasaun. Ninia ezemplu sei kontinua fo naroman ba jerasaun sira iha futuru.
Prezidente Ramos Horta konklui nia mensajen ho orasaun ba Família Real no povu Tailandia nian, hodi dezeja sira konsolasaun no serenidade durante períodu lutu nasional ida nee.
Prezidente hatoo nia esperansa katak memoria husi Sua Majestade Liurai feto Sirikit Inan Liurai feto sei dura nuudar símbolu domin, servisu no dedikasaun ba Reinu no ninia povu.
Jornalista: Emerenciana Pinto
Editor: Xisto Mendonça
