DILI, STLTIMORLESTE.com – Prezidente Republika (PR), Jose Ramos Horta husu Prezidente Biskleta ou Siklizmu, Herquilano dos Santos atu hamoris fali atividade Tour de Timor.
Kestaun nee hatoo husi Prezidente Biskleta ou Siklizmu, Herquilano dos Santos ba jornalista sira, bainhira remata halo enkontru ho Prezidente Republika Jose Ramos Horta iha Palasiu Prezidensial Nicolao Lobato, Bairo Pite, Kuarta (05/11/2025).
Nia dehan, ohin halo enkontru ho Prezidente Republika Jose Ramos Horta no iha biban nee Prezidente husu atu hamoris hikas atividade Tour de Timor. Husu parte siklizmu nia prepara atu ativa fali Tour Timor nee, Tour Timor nee hanesan uluk Prezidente realiza ona maibe ikus paradu tiha tinan barak ona la kontinua fali.
“Prezidente antes realiza ona maibe ikus paradu, tanba nee Prezidente dehan atu prepara Tour de Timor. Ita tenke hamutuk ho Indonezia atu deside halo nusa, atu hahu nee husi Indonezia mak mai ka husi Timor. Ita sei hein preparasaun depois ami prepara hotu entrega ba Prezidente mak sei deside,” dehan Prezidente Siklizmu nee.
Nia hatete, Tour Timor ida agora laos hanesan uluk halai deit nee, maibe santai nee loron ida uza ba halai deit, loron ida uza kamera hasai fotografia hodi hasai pasajen sira nee ida nee mak Prezidente Republika hakarak. Tour Timor nee uza halai ba semana ida.
Jornalista: Emerenciana Pinto
Editora: Domingas Gomes
