DILI, STLTIMORLESTE.com – Komisaun Funsaun Publiku (KFP) loke ona prosesu disiplinar ba kazu asediu seksual neebe akontese iha Universidade Timor Lorosae (UNTL).
“Kona-ba kazu UNTL nian relatoriu tama tiha ona, husi parte Ensino Superior mos hatama tiha ona, husi parte Inspesaun Disiplina Universidade nian hatama ona, hau loke ona prosesu disiplinar ba kazu ida UNTL nian nee,” dehan Komisariu Komisaun Funsaun Públika Portefoliu Disiplinar, Agapito da Conceinção ba jornalista sira, iha Kaikoli, Dili, Kuarta (05/11/2025).
Nia hatutan, Universidade sira seluk nia relatoriu seidauk too ba ida, maibe sei iha prosesu nia laran.
Maibe kona-ba Universidade sira seluk sira toma konta maka Funsionariu Publiku no ajente Administrasaun Publiku, kona-ba kazu sira seluk sira la iha intervensaun ba iha neeba, sira toma konta maka Funsionariu Permanente no Ajente Administrasaun Publiku.
Iha fatin ketak, Akademiku UNTL Sebastiao dos Santos dehan, KFP tenke foti sasan ruma ba aktu sira nee.”Presiza foti sansaun ruma ba aktu sira nee, atu labele hamosu polemika iha sosiedade nia leet,” dehan nia.
Nia dehan, edukador sai hanesan aman ba estudante sira, tanba nee presiza duni hatudu aktu neebe moral, laos aktu neebe la diak ba estudante sira.
Jornalista: Terezinha De Deus
Editora: Carme Ximenes
