BAUKAU, STLTIMORLESTE.com – Estudante hamutuk nain 4 iha Munisipiu Baukau sei tuir ezame segundu emisaun, enkuantu nain 6 lakon direitu ba ezame refere.
Diretor Servisu Munisipal Edukasaun Baukau, Afonso dos Santos da Costa esplika, tuir dadus estudante finalista kompostu nonu anu no desimu segundu anu iha Munisipiu Baukau hamutuk rihun 5 resin atu tuir ezame nasional iha anu letivu 2025 nee, maibe durante ezame lao total estudante nain 10 la tuir ezame nasional refere, tanba estudante balu moras no balu la ativu kedas iha aula desde ezame segundu periodu anu letivu 2025 nian.
“Ezame Nasional estudante hotu hotu partisipa nain 10 mak la partisipa nain 4 sei tuir segundu emisaun i sira seluk la tuir ona tanba ezame segundu periodu la tuir,” Afonso hateten ba STL iha knaar fatin Vila Nova Baukau, Kuarta (05/11/2025).
Nia sublina, mezmu iha ambitu ezame nasional relata ona total estudante nain 9 mak la partisipa iha ezame nasional, maibe hafoin ezame nasional remata no parte Servisu Munisipal Edukasaun Baukau simu relatoriu husi parte eskola sira, lo-loos iha total estudante nain 4 mak sei tuir iha ezame nasional segundu emisaun, tanba estudante nain 4 refere hetan moras enkuantu seluk labele tuir iha segundu emisaun, tanba la ativu ona iha eskola hahu kedas iha segundu periodu anu letivu 2025.
Nia fundamenta, estudante nain 4 refere nain 1 husi eskola ensiku baziku Postu Baguia, nain 1 husi eskola ensinu baziku Berkoli Postu Venilale, nain ida husi eskola sekundaria Katolika Santo António Baukau no nain 1 husi eskola sekundaria Katolika Sagrada Coração de Jesus Vila Nova neebe Servisu Munisipal Edukasaun Baukau relata ona naran ba nasional atu tuir hikas ezame segundu emisaun iha tempu besik.
“Relatoriu ita entrega tiha ona sira hein deit tuir segundu emisaun sei realiza iha semana ida rua nia laran,” Afonso akresenta.
Diretor Servisu Munisipal nee deklara, estudante nain 4 refere antes nee la partisipa ezame nasional, tanba kondisaun moras, maibe hafoin ezame nasional remata Servisu Munisipal Edukasaun Baukau simu hikas ona informasaun husi eskola estudante sira kondisaun diak ona atu tuir iha ezame refere.
Nia karak, ezame segundu emisaun nee rasik posibilidade sei realiza iha edifisiu Servisu Munisipal Edukasaun Baukau, maibe ho materia ezame la hanesan ho materia sira husi ezame nasional neebe liu ona.
“Materia nee sei prepara ba segundu emisaun nian sei la hanesan materia dahuluk nian, tanba kuandu materia mak hanesan nee signifika bocor untuk apa ita ezame tan,” Afonso komenta
Dirijente Servisu Munisipal Edukasaun Baukau nee husu ba estudante nain 4 refere atu kuidadu saude no mantein estuda nunee bele liu iha ezame refere hodi kontinua estudu iha eskola sira tuir mai.
Jornalista: Tomas Reis
Editora: Carme Ximenes
