DILI, STLTIMORLESTE.com – Ministru Defeza (MD) Kontra Alimirante, Donaciano do Rosário da Costa Gomes “Pedro Klamar Fuik” hateten, konstrusaun ospitál militár neebe doasaun husi Governu Xina, daudaun iha ona faze dezenhu.
Nia dehan, maske foin daudaun iha ambitu komemorasaun loron FALINTIL ba dala 50, Governu Timor Leste liu husi Ministeriu Defeza no Embaixada Xina formaliza ona akordu kooperasaun ba konstrusaunn ospitál militar andar sanulu (10) neebe konstrui iha Kuartel F-FDTL nian, prosesu nee seidauk lao, tanba daudaun husi Governu Xina sei halo hela dezenhu.
“Agora daudaun nee iha prosesu dezenhu no ba konsesaun dezenhu final ona. Ita espera katak tinan ida rua bele konklui konstrusaun nee,” hatete Ministru Defeza (MD) Kontra Alimirante, Donaciano do Rosário da Costa Gomes “Pedro Klamar Fuik” ba jornalista sira, hafoin partisipa loron dahuluk debate OJE 2026 iha faze jeneralidade iha Parlamentu Nasionál, Kuarta nee (05/11/2025).
Nia esplika, kona-ba bainhira atu halo lansamentu ba hatuur fatuk dahuluk ba konstrusaun ospitál militar nee, Governu Timor Leste hein deit husi Governu Xina, tanba doasaun ba konstrusaun ospital militar ho andar sanulu nee husi Governu Xina.
“Kona-ba lansamentu nee hein deit, depois mak imi haree. Tanba nee, doasaun no konseitu dezenhu nee sira mak sei prepara. Tanba nee, ita hein deit,” nia afirma.
Jornalista: Jeniche da Costa
Editor: Xisto Mendonça
