DILI, STLTIMORLESTE.com – Prezidente Republika (PR), Jose Ramos Horta hatoo sentidu kondolensia ba Sua Majestade Liurai Carlos III, hafoin atake komboiu iha Reinu Unidu.
Iha loron Kuarta nee (05/11/2025) Prezidente Republika Jose Ramos Horta hatoo ninia sentidu kondolensia profundu ba Sua Majestade Liurai Charles III husi Reinu Unidu Grã-Bretanha no Irlanda Norte nian, hafoin atake violentu neebe akontese iha komboiu neebe halao viajen entre Doncaster ho Londres, neebe hamate no hakanek ema barak nia vida.
Iha ninia mensajen formal, Prezidente Ramos Horta hatoo ninia profunda tristeza kona-ba akontesimentu trajiku nee, hodi haktuir prezidente hatoo sentidu tristeza ba familia sira.
“Iha momentu tristeza ida nee, hau hatoo ba Vossa Majestade, no liu husi Ita-Boot ba família vítima sira-nian, hau nia kondolensia profunda no sentimentu solidariedade. Hau hakarak mos fo omenajen ba membru pesoal ferroviariu sira, pasajeiru sira, forsa seguransa sira neebe ho aten barani no laran luak, atua hodi proteje moris sira no trava asaltante,” dehan Prezidente Republika Jose Ramos Horta.
Xefe Estadu hatete, sira nia asaun eroiku nee refleta valor diak liu husi umanidade no servisu publiku neebe inspira povu britaniku.
Prezidente reafirma Timor Leste nia solidariedade fraterna ho Reinu Unidu hodi kondena aktu violensia neebe laiha sentidu nee.
Timor Leste hamriik hamutuk ho família afetadu sira hotu no hamutuk ho sira neebe rekupera husi kanek fíziku no emosional neebe kauza husi trajedia ida nee.
Jornalista: Emerenciana Pinto
Editor: Xisto Mendonça
