DILI, STLTIMORLESTE.com – Prezidente Republika (PR), Jose Ramos Horta hatoo solidariedade ba Vietname, hafoin akontese dezastre naturais.
Iha loron Kuarta nee (05/11/2025) Prezidente Republika Jose Ramos Horta hatoo ona ninia simpatia no solidariedade neebe klean hafoin inundasaun no rai halai foin lalais nee, neebe akontese iha Vietnam sentral, neebe sai agravadu liu tan husi aprosimasaun tufaun Kalmaegi.
Prezidente Ramos Horta haruka ona mensajen formal simpatia no solidariedade neebe klean ba Lương Cường, Prezidente Republika Sosialista Vietnam nian.
Prezidente Ramos Horta hatoo sentidu kondolensia profunda husi povu Timor Leste nian afirma Prezidente hatoo sentidu tristeza ba familia vitima sira.
“Hau hatoo ba Sua Exelensia, ba família vítima sira, no ba povu Vietnam tomak sentidu kondolensia profunda Timor Leste nian, hamutuk ho ami nia espresaun solidariedade fraterna iha momentu tristeza no prevasaun ida nee. Hau akompanha ho admirasaun klean, autoridade vietnamita sira nia esforsu inkansavel, ekipa salva moris no komunidade lokal sira hodi salva vida sira, fornese asistensia umanitaria, no harii fali infraestrutura sira neebe afetadu,” dehan PR Horta.
Xefe Estadu Ramos Horta hatutan Espíritu reziliensia no unidade neebe karakteriza povu Vietnam nian nafatin sai hanesan fonte inspirasaun ba Timor oan hotu.
Prezidente Ramos Horta reafirma relasaun fraternu entre nasaun rua nee. Timor Leste hamriik iha solidariedade ho Vietnam no hatoo esperansa ba susesu husi esforsu tulun no rekuperasaun neebe lao hela.
Jornalista: Emerenciana Pinto
Editor: Xisto Mendonça
