BAUKAU, STLTIMORLESTE.com – Iha tinan nee Autoridade Suku Hae-coni utiliza orsamentu husi Programa Nasional Dezenvolvimentu Suku (PNDS) hodi loke estrada foun husi area Burira, Suku Hae-coni, Postu Administrativu Baguia too iha area Uaibutai, Postu Administrativu Kelikai, Munisipiu Baukau.
Xefe Suku Hae-coni, Luis Oliveira informa, iha tinan 2025 Autoridade Suku Hae-coni hetan alokasaun orsamentu husi PNDS hamutuk rihun US$ 41, nunee Autoridade aloka ba konstrusaun estrada foun husi Burira Hae-coni too Uaibutai Postu Kelekai ho distansia kilometru 4 resin.
“Ami loke estrada foun hakarak liga ho Postu Kelikai, Suku Letemumo depois populasaun sira ba Kelikai karik liu husi deit estrada nee du ke lao haleu fali foho Matebian mak too iha Kelikai,” hateten Luis Oliveira ba STL, liu husi telefone, Kinta (06/11/2025).
Objetivu Suku utiliza orsamentu husi PNDS loke estrada foun tuir nia atu ajuda movimentu komunidade sira nian, tanba durante nee komunidade sira husi Postu Baguia liu liu komunidade sira iha Suku Hae-coni maioria iha relasaun familia ho komunidade sira iha Postu Kelikai, maibe ba Kelikai tenke ho transporte lao haleu foho Matebian ho distansia dook hafoin too iha Kelikai, tanba nee Autoridade Suku inisia projetu nee hodi ajuda komunidade sira lao besik ba Kelikai no husi Kelikai ba Baguai.
Maibe projetu loke estrada foun nee hahu iha fulan Setembru tinan nee responsabiliza husi kompanhia lokal Manudare Unipesoal, Lda daudaun finaliza ona.
“Agora dalan nee utiliza tiha ona husi Kelikai mos karrera motor sae ona ba Baguia Hae-coni husi Hae-coni mos ba ona Kelikai,” Luis Oliveira akresenta.
Nia argumentu, planu seluk Autoridade Suku planeia aloka orsamentu husi PNDS ba loke estrada foun atu fasilita vizitante sira nia movimentasaun ba foho Matebian.
Entertantu estrada nee fo asesu ba komunidade sira husi Suku Afaloikai, Osso-Huna no Hae-coni.
Jornalista: Tomas Reis
Editora: Carme Ximenes
