BAUKAU, STLTIMORLESTE.com – Familia hamutuk uma kain 65 iha Suku Afaloikai, Postu Administrativu Baguia, Munisipiu Baukau, iha tempu udan han deit kumbili no produtu lokal seluk tan, tanba laiha foos.
Xefe Suku Afaloika, Jermano João Baptista hateten, estrada mak sai save ba transporte sira atu ajuda komunidade sira iha baze asesu merkadu hodi sosa sasan nesesidade bazika sira, maibe felizmente estrada husi Baguai ba Suku Afaloikai kondisaun aat, tanba Governu seidauk halo reabilitasaun hodi ajuda negosiante sira lori foos no sasan nesesidade bazika seluk tan faan too iha Suku Afaloika nunee komunidade sira neebe iha transporte lokal hanesan kuda ba sosa foos iha Postu Kelikai no balu ba sosa foos no seluk tan iha Postu Uatulari, Munisipiu Vikeke enkuantu komunidade seluk neebe laiha forsa atu lao obrigado tenke kee kumbili, feuk, talas hodi han auguenta nesesidade.
“Estrada la diak nee fo impaktu ba komunidade sira tanba iha nee ida iha kuda atu ba sosa aihan nee agrasede mais ida lao labele bele nee sira komsumu deit aihan neebe uluk avo sira komsumu iha tinan 50 ba kotuk nee sira konsumu deit ida kumbili iha ai laran nee sira ba kee ida nee,” hateten Jermano ba STL liu husi telefone, Kinta (06/11/2025).
Komunidade hirak neebe konsumu kumbili Autoridade Suku identifika ona iha Aldeia Buibela hamutuk uma kain 7, iha Lena’a 37 no iha area Uaimata sorin uma kain 21.
No preokupasaun nee Autoridade Suku relata ona pedidu ba Ministeriu Solidariedade Sosial no Inkluzaun atu tau matan ba komunidade hirak nee no fo ona apoiu nesesidade bazika, maibe la sufisiente, tanba nee husu atu fo apoiu nafatin iha tempu atual liu liu tempu udan, tanba iha tempu udan mak komunidade hirak nee halerik ba hahan.
“Hanesan Autoridade Suku rekomenda ba Ministeriu relevante, se bele karik Primeiru Ministru orienta orienta Ministeriu relevante lao too area remotas, iha fatin neebe mak tempu udan karreta labele tama ba para observa nunee bele hatene loos ga lae,” Jermano sujere.
Autoridade Suku nee husu ba Ministeriu Solidariedade Sosial no Inkluzaun atu tuun direita too iha area remotas sira neebe transporte publiku no privadu labele asesu nunee bele hatene komunidade sira nia moris, tanba komunidade hirak neebe sei moris terus ba hahan no seluk tan, moris iha area remotas neebe la asesu estrada.
Nia dehan, iha area neebe temi laiha negosiante ida atu faan sasan nesesidade bazika sira, tanba kondisaun estrada ba area refere kondisaun aat no grave iha maioria parte suvida makaas difikulta transporte tula sasan too iha area refere, nunee komunidade sira mezmu iha osan maibe labele sosa.
Entretantu Suku Afaloikai rejistu total populasaun hamutuk 1.258 husi uma kain 258 hela iha Aldeia Buibela, Lena’a, Okilari no Uaimata.
Jornalista: Tomas Reis
Editora: Carme Ximenes
