DILI, STLTIMORLESTE.com – Daudaun nee Kandidatu Ajente Polísia Nasional Timor Leste (PNTL) foun tinan 2025 husi Munisipiu Aileu hamutuk ema nain 300 hahu tuir teste fiziku iha Centro Formação Polícia (CFP) Komoro, Dili.
Prezidente Juri ba Rekrutamentu Aktual Segundu Komandante Jerál PNTL, Komisariu Polísia Pedro Belo husu ba kandidatu sira atu halo tuir regras hotu-hotu neebe implementa ona iha nee.
“Alin sira ruir ita nia lei no diploma ministerial Nu.37/2025, ita boot sira halo ho tuir didiak. Orsida iha instrusaun ruma husi ekipa tekniku neebe maka hamutuk ho ita boot sira, husu ita boot sira halo tuir ho didiak. Hau fiar katak ita boot sira hotu prepara fisiku durante fulan hirak nia laran no balun prepara aan iha tinan ida ka rua liu ba, balun maka foin dadaun mai wainhira anunsiu sai ona atu halo rejistu mak balun prepara aan fisiku, maibe laiha buat ida, ita boot sira prepara aan didiak, orsida bele hetan valor diak,” hatete Komisariu Polísia Pedro Belo, liu husi nia diskursu iha ambitu abertura teste fisiku iha Centro Formação Polícia (CFP) Komoro, Kinta (11/06/2025).
Nia informa, ohin hahu husi Munisipiu Aileu, ho fiar katak Aileu nee foho mos barak kandidatu sira halai bebeik, tanba nee kandidatu sira fisiku diak no halo tuir instrusaun sira neebe maka iha.
“Hau husu ba ekipa tekniku sira atu asiste kandidatu sira ho didiak tuir regras neebe maka iha, maibe labele halo liu regras neebe iha. Ohin ita boot sira bele kontinua dader, husi parte tekniku sira no lokraik sei kontinua ho entrevista. Hau apela ba ekipa tekniku atu bele fasilita kandidatu sira iha prosesu sira nee hotu,” deklara nia.
Entretantu tuir observasaun STL iha terenu, parte dader nian kandidatu Ajente PNTL husi Munisipiu Aileu hamutuk ema nain 150 maka partisipa iha teste fiziku nian, hafoin iha parte lokraik kandidatu hamutuk nain 150 maka partisipa.
Depois teste fisiku nee hahu husi kandidatu sira sae moru, haksoit baki, tara aan iha besi ba kandidatu mane no bomba rai ba kandidatu feto, sit up no halai too metru 200. Iha parte lokoraik kandidatu sira sei partisipa iha teste entrevista. Teste etapa tuir mai maka fisiotest, fisiomotor no teste saude. Hafoin Munisipiu Aileu sei kontinua ba Munisipiu seluk tuir alfabetu.
Durante teste nee halao, hetan monitorizasaun no fiskalizadorhusi ekipa Ministeriu Interior no Guarda Nacional Republicana (GNR) iha Timor Leste.
Jornalista: Jeniche da Costa
Editora: Domingas Gomes
