DILI, STLTIMORLESTE.com – Tribunal Judisial Primeira Instansia Dili (TJPID) kontinua halao julgamentu ba kazu Sukestru no Abuzu Poder neebe envolve husi arguidu nain tolu, JXB, MdC no DNS hodi kontinua rona sasin ida.
Iha sala julgamentu laran sasin Gastão Piedade deklara katak, antes nee servisu hanesan Diretor Informasaun Servisu Nasional Intelijensia, no oras nee daudaun halao knaar hanesan Xefe Departamentu Servisu Informasaun Polisia.
Sasin deklara katak, konhese arguidu nain tolu, sira hanesan membru F-FDTL, no momentu neeba destakadu hanesan Intelijensia.
Sasin deklara, momentu neeba lezadu utiliza meius ida bosok, uza Jeneral sira nia naran katak, Jeneral sira promete ba lezadu atu ba buka ema hodi foti osan, atu nunee bainhira iha rekrutamentu ba iha F-FDTL sira bele pasa.
Sasin dehan, Jeneral balu la konkorda ho sira nia identidade ema ida uza ba faan tun sae, no ikus mai sasin simu orientasaun husi Diretor Jeral SNI atu buka tuir ema sira nee, atu bolu mai iha polisia hodi indentifika.
No simu tiha orientasaun, hanesan xefe informasaun, sasin orienta arguidu nain tolu atu identifika ema nee, lori ba iha polisia atu husu motivu saida mak nia halo hanesan nee.
Sasin deklara, momentu neeba arguidu nain tolu mak lori lezadu ba aprezenta, no intelijensia nia servisu mak hatene deit informasaun, tanba nee sasin konfirma ba iha lezadu, no lezadu deklara motivu halo ida nee tanba lezadu moris susar no sente fasil liu mak uza Jeneral sira nia naran hodi husu osan.
Sasin deklara, sira nia papel mak hatene deit informasaun, kuandu konfirma informasaun remata ona, tuir mai kabe ona ba iha parte investigasaun nian.
Sasin deklara, banhira lori lezadu ba iha Komando, sasin la haree arguidu sira baku lezadu, maibe se baku iha fatin seluk sasin la iha konhesimentu, tanba depois de sasin konfirma tiha motivu husi aktu nian, lezadu entrega ona ba iha parte investigasaun nian.
Sasin dehan, momentu sasin konfirma motivu ba iha lezadu, sasin haree ema barak mak iha Komando, arguidu nain tolu ho mos Investigador PNTL nian.
Sasin esklarese ba Tribunal, iha parte tolu mak sira halo atu konklui informasaun ida, primeiru sira rekolha informasaun husi media sosial, segundu husi parte vitima, terseiru liu husi servisu Operasaun intelijensia, tolu nee mak ikus mai sira konklui katak, lezadu nia aktu nee bosok, hodi haruka buka tuir lezadu atu konfirma kona-ba nia motivu.
Audensia julgamentu nee, prezide husi Juiz Koletivu, Ana Paula, Ersilia de Jesus, Jose Maria, Ministeriu Publiku reprezenta husi Prokurador Aderito Tilman, arguidu sira hetan asistensia legal husi Defensor Publiku Sergio Dias Quintas.
Jornalista: Terezinha De Deus
Editor: Xisto Mendonça
