DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu nain 8, tanba komete krimi hasoru lezadu ho inisial DdS.
Tuir akuzasaun katak, arguidu LMF, JG, SAAG, JG, DdDS, DFG, AdSS, IdCS, nuudar membru arte Ritual 77.
Iha loron 07 fulan Agostu 2017, oras tuku 03:00 OTL, arguidu sira ho kondisaun lanu, sae motorizada ho kanu resin halai iha estrada publiku hodi kontra tranzitu husi Akait ba Bairo Formoza no mos halo barulhu.
Wainhira too iha Palasiu Governu nian oin, arguidu sira hakilar hodi hatudu jestu no mos tolok lezadu, nunee halo lezadu sente tauk.
Kuandu motorizada sira nee fila fali husi Bairo Formosa, arguidu sira balun hodi rama ambon hana ba lezadu no balun hodi fatuk tuda lezadu kona iha liman, rezulta lezadu nian liman parte karuk hetan moras no metan.
Nunee, komunidade sira sente la hakmatek hodi kontaktu ba polisia, kaer arguidu sira iha lokal, prende mos Rama ambon husi arguidu sira.
Motivu husi problema nee tanba arte marsial hodi hamosu intranquilidade ba publiku.
Tanba nee, konstitui arguidu nuudar ko autoria material ba krimi Utilizasaun ba arma Branca turi artigo 20 n. 2 alinea a) no mos artigu 200 n.1 husi Lei N.5/2017.
Hatan ba akuzasaun neebe iha, arguidu DdDS deklara katak, momentu neeba sira hemu hamutuk hela no sira nia kolega arguidu LMF sofre moras, tanba nee sira lori ba iha HNGV.
Arguidu deklara, too iha HNGV sira kondisaun lanu hela, tanba nee Doutor haruka sira fila no dehan aban mak mai fali.
Arguidu deklara, sira fila liu husi Bidau Masau nian, haree lezadu monu hela iha trotoar leten, tanba nee sira deside atu lori lezadu ba iha Hospital maibe lezadu lakohi, tanba nee sira tula lezadu fila fali ba nia uma.
Tribunal konfirma kona-ba lezadu nia kanek, arguidu deklara haree sasin kanek iha nia koskoleta no kabas, maibe arguidu sira la husu kona-ba kanek nee se mak halo.
Rona tiha arguidu, Tribunal adia ba loron seluk hodi rona arguidu sira seluk nia deklarasaun.
Audensia julgamentu nee prezide husi Juiz Koletivu, Jose Maria, Ersilia de Jesus, Ana Paula, Ministeriu Publiku reprezenta husi Prokurador Aderito Tilman, arguidu hetan asistensia legal husi Defensor Publiku Manuel Exposto.
Jornalista: Terezinha De Deus
Editor: Xisto Mendonça
