DILI, STLTIMORLESTE.com – Komando FALINTIL-Forsa Defeza Timor Leste (F-FDTL) liu husi Komandante Komponente Naval Komodoro Higinio das Neves fo pose ba Kapitaun Fragata Graduadu Nicolau Sousa, hodi asumi kargu nuudar Segundu Komandante Komponente Naval.
Komandante Komponente Naval, Comodoro Higinio da Neves dehan, Kapitaun Fragata Graduadu Nicolau Sousa liu husi despaisu Xefe Estadu Maiór Jenerál Forsa Armada (XEMGFA) Domingos Raul “Falur Rate Laek” numeru 064/CEMG das FALINTIL-FDTL/IX/2025 hodi asumi kargu nudar Segundu Komandante Komponente Navál hahu husi loron tolu 30 de Outubru 2025 hodi sunbtitui Segundu Komandante Komponente Naval sesante Kapitaun Fragata Guido Guterres da Silva.
Nomeasaun ba Kapitaun Fragata Graduadu Nicolau Sousa ba kargu Segundu Komandante Komponente Navál ba tuir lei orgánika militár ba tinan rua.
Enkuantu Segundu Komandante Komponente Navál sesante, Kapitaun Fragata Guido Guterres da Silva, liu husi despaisu Xefe Estadu Maiór Jenerál Forsa Armada (XEMGFA) Domingos Raul “Falur Rate Laek” númeru 195/DIV.Pesoál/QG-F-FDTL hodi asume fali funsaun hanesan Adjuntu Inspesaun iha Kuartel Jeneral Fatuhada, Dili.
Komodoro Higinio das Neves deklara, nomeasaun Kapitaun Fragata Graduadu Nicolau Sousa ba kargu Segundu Komandante Komponente Navál nia sei halo servisu neebe diak.
“Hau fiar katak Kaomandante Nico laos ofisiál foun, maibe nia husi Komponente, nia hatene hau nia servisu tanba nia hamutuk ho hau durante tinan rua, nee duni hatene saida mak nia bele halo,” dehan nia ba jornalista sira iha iha Komponente Naval Hera, Segunda (10/11/2025).
Iha intervensaun ambitu fo pose ba segundu Komandante Komponente Navál Kapitaun Fragata Graduadu Nicolau Sousa iha baze Navál Hera, nia fo parabens ba Kapitaun Fragata Graduadu Nicolau Sousa neebe Komandu nomeia ba Segundu Komandante Navál.
“Parabens ba ita, responsablidade aumenta fiar katak ita sei servisu ho hau servisu ho ofisiál sira neebe iha Komponente Navál hodi bele halo knaar ho diak.Lori Komponente Navál ba dalan neebe ita hotu hein,”nia kongratula.
Iha biban nee mos Komodoro Higinio kongratula Kapitaun Fragata Guido Guterres neebe hetan fiar husi Komandu hodi ba halo fali knaar iha Kuartel Jeneral husu atu servisu diak.
Iha intervensaun Komodoro Higinio esplika, ho mudansa neebe mosu iha Komponente Naval nee nudar tranzisaun ida neebe Komandu F-FDTL komesa halao para neneik ba neneik atu entrega forsa jerasaun foun.
Nia hatutan, durante nia mandatu hanesan Komandante Komponente Navál nia segundu tolu ona, ida mak Juliao agora nia ohin loron sai Superiór iha Autoridade Máritima Nasional, ida mak Kapitaun Fragata Guido no agora Kapitaun Fragata Graduadu Nicolau.
“Nee atu hateten saida ba ita boot sira signifika ida faze ida ba ona atu bele tránzita knaar sira nee ba jerasaun foun. Tanba nee ita sei fiar katak lori forsa nee ba oin,” nia koalia.
Komodoro nee kompomente sei servisu hamutuk ho Segundu Komandante Komponente Navál hodi deszenvolve Komponente Navál ho diak.
Komandante Higinio afirma, ida nee misaun ida neebe todan.
“Maibe hau fiar se ita hamutuk ita servisu hamutuk rona malu, fiar malu mai ita sei susesu iha misaun neebe sei ita nian,”nia argumenta.
Nia husu ba membru Komponente Navál atu nafatin hatudu karakter no displiña neebe diak atu, tane nafatin integridade institusaun F-FDTL ho diak.
Jornalista: Jeniche da Costa
Editora: Domingas Gomes
