DILI, STLTIMORLESTE.com – Tribunal Judisial Primeira Instansia Dili (TJPID) kontinua halao julgamentu ba kazu baku funsionariu Bombeirus, hodi rona deklarasaun husi lezadu no sasin, tanba antes nee rona ona deklarasaun husi arguidu nain tolu ho inisial MM, LM no RMT.
Iha julgamentu kontinuasaun nee lezadu AdJMP deklara katak, akontese duni problema maibe sira diak malu ona, no arguidu MM buka lezadu rezolve ona.
Lezadu deklara, iha duni diskusaun maka ikus mai mosu agresaun, maibe arguidu sira buka lezadu hodi tur hamutuk no sira diak malu ona.
Aleinde nee sasin Roberto Medonsa deklara katak, momentu neeba sira hetan kontaktu atu ba ajuda dada kareta neebe monu, maibe sira to iha neeba ho objetivu atu dada kareta.
Sasin deklara, momentu neeba diskute malu kona-ba ai neebe atu tau tali ba, maibe mosu tiha diskusaun sira la konsege tau tali ba hodi dada kareta, tanba nee sira foti desizaun atu fila fali ba sira nia kantor.
Maibe sira atu fila maka mosu tiha problema, maibe sasin maka lori kareta, tanba nee la hatene se maka baku uluk lezadu.
No hare lezadu maka tuku uluk arguidu MM, tanba nee maka arguidu MM dudu tiha lezadu. Konaba se maka baku lezadu, sasin la iha konhesimentu kona-ba ida nee.
Rona tiha lezadu no sasin, Tribunal adia ba loron seluk hodi tama ba iha faze alegasaun.
Antes nee arguidu RMT deklara katak, kona-ba dehan arguidu tuku lori liman nee lalos, maibe kona-ba kareta ida monu nee loos, no arguidu mos ajuda hiit fos neebe iha, no arguidu too iha fatin refere Bombeirus seidauk iha neeeba.
Arguidu deklara, kona-ba se mak telefone Bombeirus arguidu la hatene, no arguidu haree arguidu nain rua seluk mos iha neeba. Momentu neeba arguidu haree no rona lezadu ho arguidu MM maka deskuti malu, no kareta nee monu besik sira nia uma.
Tuir arguidu, iha tiha fatin akontesumentu 30 minutu maka Bombeirus foin to, no haree lezadu no arguidu MM deskuti malu kona-ba atu kesi tasi iha besi rin hodi dada karreta, maibe arguidu MM lakohi tanba se kesi iha besi rin nee monu kona arguidu MM nia uma.
Arguidu deklara tan, lezadu maka dudu uluk arguidu, tanba nee arguidu mos dudu fali lezadu, kona-ba tuku arguidu la tuku ida, depois arguidu fila ona konaba dehan baku lezadu, arguidu la hatene ida.
Nunee mos arguidu LM deklara, kona-ba dehan lori kapasete baku lezadu nee lalos, maibe kona-ba karreta neebe monu loos tanba besik sira nia uma, no arguidu sira ajuda lalin sasan sira neebe monu tun husi karreta, no liu tiha oras ida maka Bombeirus foin mai.
Arguidu deklara, kuandu Bombeirus sira too mai seidauk iha problema, maibe depois iha problema ho arguidu MM deskuti malu ho lezadu, arguidu la hatene ida, no deskuti malu kona-ba saida mos arguidu la hatene, maibe ikus maka rona dehan kesi tali ka katrol ba eletrisidade nia rin arguidu MM la aseita maka mosu problema.
Konaba arguidu MM tuku lezadu nee, arguidu la haree e ida, tanba rona ema barulu tauk arguidu mos halai.
Arguidu deklara, kona-ba lezadu no arguidu MM diskuti malu arguidu la hare, tanba ajuda aruma lalin hela sasan sira neebe monu husi kareta.
Aleinde nee arguidu MM deklara katak, momentu neeba karreta monu nee loos, besik arguidu nia uma oin, no arguidu mos iha uma hela. Karreta monu tiha iha foos nakonu, tanba nee sira husu ajuda ba hatun foos sira nee, no kareta Bombeirus mai husi Tasi Tolu la lori material dada karreta, depois populasaun sira maka informa ba konaba karreta monu tanba nee maka sira mos ba foti tali.
Arguidu deklara, Bombeirus sira dehan atu kesi katrol ba iha besi rin, arguidu la hatan dehan kesi ba iha ai kakeu, iha bomberos nain lima aseita lezadu maka la aseita, no lezadu hakarak kesi ba iha jambua hun ida, arguidu la aseita atu kesi iha jambua hun tanba nee maka lezadu la simu mai tolok arguidu no tebe arguidu.
Arguidu deklara, depois sira fila ona maka ema baku fali lezadu, maibe se maka baku arguidu la hatene.
Tuir faktus katak, iha loron 27/1/2021, lokraik tuku 15:00, lezadu ho sira nia equipa simu informasaun husi komunidade husi area Golgota katak, iha karreta vascolante ida tula fos bakufila iha neeba, no sira husu Bombeiros ninia apoiu, nunee lezadu ho nia kolega nain 5 (grupu ida) ba iha fatin neebe karreta baku fila ba, sira nain 6 ba atu ajuda dada los fali karreta neebe maka bakufila. Maibe antes sira too iha neeba, ema barak maka iha tiha ona fatin refere.
Kuandu lezadu ho nia ekipa atu halo ona sira nia servisu, arguidu MM mak koalia barak dehan ami la presiza ona Bombeiros”, tanba nee maka lezadu ba besik arguidu MM hodi hateten ba nia katak” se hanesan nee ami fila ona, tanba ami mai bazeia ba informasaun neebe maka hato ba iha edefisiu.
Hafoin lezadu hateten nunee, arguidu MM dudu kedas iha lezadu nia hirus matan halo lezadu atu monu ba kotuk, maibe la konsege tanba iha kolega balun maka satan netik husi kotuk.
Iha altura nee, lezadu nia ain sorin los mos hit sae, maka arguidu MM kaer iha lezadu nia ain nee atu halo monu lezadu, maibe nia kolega maka tahan nafatin, no la akontese tan agresaun ruma husi arguidu.
Katak, tanba impedementu husi arguidu ho suspeitu deskonhesidu sira maka lezadu ho ninia ekipa Bombeirus mos aruma sira nia sasan tau iha krareta atu fila ona, maibe arguidu MM, RMT, LM, ho tan suspeitu deskonhesidu sira ema barak ba atake lisuk fali lezadu. Balu kaer ai, fatuk tuda no baku no balu mos tuku tebe kona iha lezadu nia hirus matan, liman sikun no kona mos lezadu nia ulun sorin karuk too kanek ran sai barak.
No lezadu ninia situasaun refere, maka lezadu nia kolega sira lori kedas ba sentru saude Komoro hodi hetan tratamentu mediku no suku.
Iha mumentu nee lezadu nia kolega sira seluk la hetan agresaun ruma husi suspeitu sira, maibe lezadu mesak. No lori tiha ona lezadu ba sentru saude maka foin Polisia ba iha fatin akontesimentu hodi kaer arguidu sira.
No deklara katak, arguidu MM dudu no tebe kona iha lezadu nia ain tur sorin loos. No arguidu LM mak kaer kapasete baku ba lezadu nia ulun too kanek, no arguidu RMT maka tuku kona iha lezadu hasan sorin loos.
Arguidu sira nia asaun nee maka lezadu ho nia ekipa Bombeirus la dada karreta neebe baku fila no tula fali lezadu fila fali tiha deit ba sira nin servisu fatin.
Bombeirus ba halao servisu Estadu nian atu ajuda komunidade neebe husa ajuda, nunee arguidu sira impede too hamosu lezadu hetan kanek no moras.
Kona-ba problema refere, iha dia 29/1/2021, dadersan Xefe Suku Komoro, Xefe Aldeia ho Delegadu Suku nian, ba deit iha lezadu nia servisu fatin husu tiha ona diskulpa, no promete atu hasoru malu hodi rezolve tuir dalan familia tanba sira mesak sei vizinho.
Arguidu RMT, LM no MM hakarak ho intensaun impede no halo agresaun fizika kontra fuasionariu Bombeirus ninia servisu, hodi kauza lezadu hetan kanek, bubu, moras iha zona atinjidu.
Arguidu sira hatene katak, impede funisonarius kompetente too la bele halao sira nia funsaun, nuudar aktus krime obstrusaun ba autoridade publika, tanba nee kontra lei no hetan kastigu penal.
Ho nunee, arguidu sira hanesan autor Material ho forma konsumada, hodi pratika krime ida obstrusanu ba autoridade publika neebe previstu no punidu tuir artigu 243 husi Kodigu Penal.
Audensia julgamentu nee, prezide husi Juiz Kolektivu, Ivan Patrocenio, Arjentino Nunes, Juiz Estajiadu nain ida, Ministeriu Publiku reprezenta husi Prokuradora, Remizia De Fatima, arguidu nain tolu hetan asistensia legal husi Advogadu Privadu, Joao.
Jornalista: Terezinha De Deus
Editora: Carme Ximenes
