VENILALE, STLTIMORLESTE.com – Fundasaun Sentru Feto Haburas Dezenvolvimentu (F-CFHD) lori grupu agrikultores sira husi troka tekniku area hortikultura nian iha Suku Hato-Haco, Postu Administrativu Venilale, Munisipiu Baukau.
Koordenadora programa husi F-CFHD, Jacinta do Carmo de Sá esplika, Fundasaun Sentru Feto Haburas Dezenvolvimentu iha tinan 2025 hetan fundus husi Gabinete Apoiu Sosiedade Sivil atu kapasita no apoiu grupu benefisiariu sira iha baze atu aumenta numeru produsaun, liu-liu iha area hortikultura, tanba nee Fundasaun Sentru Feto Haburas Dezenvolvimentu lori grupu benefisiariu husi Suku Uma Ana Ico halo estudu komparativu iha Grupu Suku Hatu-Haco nian atu troka tekniku no dezenvolvimentu area hortikultura.
“Husi estudu komparativu atu hasae konhesimentu grupu nian diak liu tan, maske sira nia produtu hanesan, maibe sira nia metodu balu halao la hanesan, neebe mak esklarese duni husi membru grupu sira, tanba nee ami lori sira mai atu kompleta malu,” Jacinta hateten ba jornalista sira iha Hato-Haco Venilale, Kinta (19/11/2025).
Nia katak, grupu hortikultura 2 refere daudaun sira kuda produtu hanesan repoilhu no ai-fuan dragaun, maibe membru sira husi grupu refere kuda ho metodu neebe la hanesan, tanba nee parte Fundasaun Sentru Feto Haburas Dezenvolvimentu inisia programa estudu komparativu refere hodi grupu 2 refere troka tekniku kuda neebe diak tuir padraun hortikultura nian, nunee bele iha rezultadu koilheta hodi aumenta rendimentu ekonomia familia.
Xefe Grupu KJH, Ponciano dos Santos Belo hateten, liu husi estudu komparativu refere hetan esperensia foun liu-liu kuda ai-fuan dragaun nian, tanba durante membru husi grupu KJH kuda laiha rezultadu koilheta, tanba laiha konhesimentu kuda.
“Ami mos mai haree sira kuda repoilhu, ami observa sira kuda distansia besik liu entaun fo impaktu bele estraga produsaun, kuda diak liu nee distansia tenke 40 sentimetru, entaun ami fo hatene sira kuda tenke entre hun ida ba hun ida 40 sentimetru,” Ponciano katak.
Enkuantu Xefe Grupu Hortikultura Hamabumor, Jorge Antonio Guterres konsidera estudu komparativu refere importante, tanba bele troka tekniku kuda nian iha area hortikultura.
“Sira husi Uma Ana Ico mai iha nee buat foun neebe sira ladun hatene mak oinsa kuda bua naga, ida nee mak ohin ami fahe esperiensia ba sira no esperiensia foun neebe ami hetan husi Grupu Uma Ana Ico nian mak liga ba kuda repoilhu no bronkoli kona-ba distansia neebe atu hadook tan oituan, ida nee mak ohin ami fahe ba malu, ida bua naga nian mak ami fo oinsa mak kapa atu fuan boot no moris diak,” katak Jorge.
Entretantu estudu komparativu refere hetan partisipasaun husi membru grupu sira no akompanhamentu husi ekipa Fundasaun Sentru Feto Haburas Dezenvolvimentu no Autoridade Suku Uma Ana Ico.
Jornalista: Tomas Reis
Editor: Xisto Mendonça
