BAUKAU, STLTIMORLESTE.com – Sentru Saude Venilale iha Munisipiu Baukau sosa bee moos husi tanke bee, hodi atende nesesidade pasiente sira nian.
Xefe Sentru Saude Venilale, Marciana O. da Costa esplika, iha tinan hirak ba kotuk parseiru dezenvolvimentu hanesan UNICEF apoiu ona perfurasaun bee moos hodi utiliza iha Sentru Saude refere, maibe bee moos neebe oferese liu husi perfurasaun utiliza deit iha tempu udan enkuantu iha tempu bailoron, Sentru Saude Venilale tenke sosa bee moos hafoin utiliza ba nesesidade pasiensia sira nian liu liu inan isin gravida sira neebe atu partu.
“Tempu bailoron ami menus tebes bee, tanba ami laiha tan fatin fornesementu bee moos husi fatin seluk ami mak depenti deit ba ami nia bee ida nee no ami sosa husi tangki,” Marciana hateten ba jornalista sira, iha knaar fatin Venilale, Baukau, Kuarta (19/11/2025).
Nia sublina, bee moos neebe sira daudaun utiliza ba nesesidade pasiente sira nian sosa husi transporte tangki privadu sira ho folin US$ 20.00 kobre litru 5000, maibe utiliza la too semana rua, tanba depende ba atendimentu.
Nia informa, orsamentu neebe utiliza ba sosa bee moos apoiu husi Servisu Munisipal Saude Baukau, maibe diak liu mak buka meius kanaliza bee moos direita ba Sentru Saude nunee bele garantia, tanba transporte tangki privadu neebe faan bee iha Venilale unidade 2 deit, neebe bele fo impaktu ba bee moos iha Sentru Saude refere bainhira transporte faan bee moos avaria ruma.
“Nee fo impaktu duni, tanba ami iha nee halo atendimentu publiku liu liu area maternidade inan partus nebee emerjensia ami prezisa tebes bee,” Marciana akresenta.
Nia husu parte kompetente sira iha Munisipiu Baukau atu tau atensaun no solusiona preokupasaun bee moos iha Sentru Saude Venilale, tanba servisu saude fo atendimentu ba pasiente sira ho hijene.
Hatan ba kestaun nee, Sekretaria Munisipal Asuntu Sosial, Maria Celestina Viegas hateten, Servisu Autoridade Munisipal liu husi Dirasaun Agua no Saneamentu daudaun atende hela probelma bee moos iha nivel Munispiu, maibe atu responde ba preokupasaun bee moos iha Sentru Saude Venilale depende fila fali ba politika Autoridade komunitariu sira iha Postu Administrativu Venilale.
“Kona-ba bee moos nee ita liu husi Dirasaun Servisu Munisipal Agua no Saneamentu sira halo hela servisu, ida nee mais oinsa mak ita atu tau prioridade depende fila fali planu husi Autoridade komunitariu sira, oinsa mak fo prioridade liu liu ba bee nee bele responde ba Sentru Saude nee,” hatete Maria.
Husu Autoridade Komunitariu sira iha Postu Administrativu Venilale atu tau prioridade ba problema bee moos iha Sentru Saude Venilale liu husi planu prioridade Postu nian, nunee bele responde no kanaliza bee moos ba Sentru Saude refere, tanba Sentru Saude refere eziste atu fo atendimentu no asistensia saude ba komunidade sira hotu liu liu komunidade sira iha Postu Administrativu Venilale.
Entretantu Sentru Saude Venilale nia atendimentu ba komunidade sira husi Suku Fatulia, Uatu-Haco, Uailha, Uma Ana Ulo, Uma Ana Ico, Bado-Ho’o, Baha-Mori inklui Uai-Oli ho total populasaun 17.869.
Jornalista: Tomas Reis
Editora: Carme Ximenes
