DILI, STLTIMORLESTE.com – Nuudar ema sarani presiza loke fuan ba Maromak, husik Espiritu Santu hela iha fuan, nunee moris tuir Maromak nia hanorin sira.
Liafuan nee hatoo husi Padre Richardo Pasang SVD liu husi reflekssun ba loron Sesta (21/11/2025).
Konaba renovasaun moris katak ema presiza nakloke aan ba Maromak no prepara fuan sai fatin ba Espiritu Santu.
Padre hatete, leitura ba loron Sesta koalia konaba oinsa ema idak idak bele nakloke aan no oferese aan tomak ba Maromak.
“Sentidu leituras ohin ba ita sarani katolika katak rekuperasaun husi fuan no oferese-an tomak ba Maromak hanesan Inan Virgem Maria neebe ohin loron ita selebra festa Apresentasaun Virgem Maria iha Templo. (1 Makabeu 4 :36-37, 52-59; Lucas 19: 45-48),” dehan Padre Richardo.
Bibi Atan Kreda Katolika nee haktuir, sentidu aprofunda leituras sublina ba ema kona ba importansia nakloke-an tomak ba Maromak atu Nai hamos ema hanesan Inan Virgem Maria neebe hori hahu dedika-an tomak ba Nai no prepara nia fuan sai hela fatin ba Espiritu Santu.
“Nai konvida ita mos atu laos deit rona Maromak nia Liafuan maibe implementa mos nia Liafuan iha ita moris,” dehan nia.
Padre haktuir, Maromak husu ema idak idak atu husik nia hahalok aat sira, muda hahalok ba diak nunee husik Espiritu Santu hela iha ema nia fuan.
“Nai hakarak hamos ita nia fuan no hahalok sira husi aat ba diak tanba ita husik Espiritu Santu hela iha ita fuan ba nafatin. Espiritu Santu sei akompanha no lidera ita hahu husi etapa kiik sira hanesan orasaun ou desizaun simples atu hapara ou halakon hahalok negativu sira iha ita moris. Ho nunee, ita bele implementa nia Liafuan atu bele harii Reino Maromak nian iha ita moris lor-loron,” katak Padre.
Mai hotu hotu nakloke-an ba Maromak no prapara fuan sai hela fatin ba Espiritu Santu hodi renova aan sai ema no eskolante foun Nai nian.
Jornalista: Emerenciana Pinto
Editora: Domingas Gomes
