DILI, STLTIMORLESTE.com – Relasiona ho standar numeru Bilhete Identidade (BI) neebe iha, sei iha mudansa ba numeru BI.
Diretor Servisu Rejistu Notariado, Agustinho Gonsalves Viera esplika, tuir standar neebe iha mudansa ba numeru BI, bainhira validade remata ona ba halo renovasaun.
“Ita nian numeru BI la prienxe standar internasional nian, tanba nomor ita nian nee numeru barak demais, tuir standar neebe iha ita hatun ba 12 gigat, iha nasaun barak iha 12 ka 13 no iha Timor mak barak liu too 17, no ema halo renovasaun mudansa numeru aumenta tan, buka standar ida internasional atu sai ID uniku ida,” dehan Diretor ba jornalista sira iha Mandarin, Sesta nee (21/11/2025).
Tuir nia, ID uniku neebe uza sei hatun ba iha numeru 12 gigat deit, atu bele funsiona ba ID hotu.
Nia argumenta, BI ida neebe sidadaun sira agora uza hela nee provizoriu, sira sei bele uza nafatin too nia validade nee remata, banhira ba halo renovasaun mak foin mudansa ba iha numeru foun.
“Fo hatene ba sidadaun sira hotu katak, mudansa ba numeru BI nee atu preparasaun tama iha ID uniku nian, nee laos buat foun ida, internasionalmente iha nasaun barak uza numeru tenke tuir standar,” dehan nia.
Nia sublina, iha nasaun seluk sira uza husi numeru 12 too iha 13, no ita nian sei hatun ba iha 12, sira neebe uza tuan kontinua uza laiha problema, sira neebe validade remata ona atu ba prolonga mak foin halo mudansa ba numeru.
Iha fatin ketak, Akademiku Universidade Nasional Timor Lorosae (UNTL), Rafael de Jesus dehan, halo mudansa ba numeru BI, ida nee depende ba iha servisu notariadu nian, importante mak servisu hotu lao diak.
“Bele halo mudansa ba iha numeru, importante mak servisu hotu lao diak hodi atende kona-ba publiku sira nia presiza,” dehan nia.
Nia hatutan, servisu neebe iha kontinua lao diak, tanba ohin loron publiku barak mak presiza trata dokumentus ba servisu sira.
Jornalista: Terezinha De Deus
Editor: Xisto Mendonça
