DILI, STLTIMORLESTE.com – Tribunal Judisial Primeira Instansia Dili (TJPID) liu husi despaisu ba prosesu primeiru interogatoriu, deside aplika medida koasaun tolu (3) ba iha arguidu SD hanesan sidadaun Xineza neebe treinu Armas iha Likisa.
Ministeriu Publiku (MP) promove arguidu mai iha Tribunal ho krime Armas Proevidas previstu iha artigu 211 husi Kodigu Penal Timor Leste.
Juiz turnu halo tiha identifikasaun ba arguidu hotu, ikus mai deside aplika medida tolu ba arguidu hanesan Termu Identidade Rezidensia (TIR), medida Aprezentasaun Periodika AP) fulan ida dala rua iha Eskuadra PNTL Dom Aleixo no medida Proibisaun ba Auzensia.
“Iha alegasaun MP husu medida Aprezentasaun Periodika no kausaun tihun US$ 10, maibe Tribunal deside aplika deit medida tolu,” dehan Advogadu Privadu, Jeronimo Piedade da Silva ba jornalista sira iha Kaikoli, Sesta nee.
Nia hatutan, hanesan defeza sei haree ba oin, atu halo rekursu ka lae kona-ba despaisu ida nee, tanba iha indikasaun katak iha detensaun neebe iha irregularidades oituan, maibe ikus mai Tribunal opta ba medida koasaun tolu.
Prosesu nee prezide husi Juiz turnu Jose Gonsalves, Ministeriu Publiku reprezenta husi Prokurador João Marques, arguidu hetan asitensia legal husi Advogadu Privadu Jeronimo Piedade da Silva.
Jornalista: Terezinha De Deus
Editor: Xisto Mendonça
