DILI, STLTIMORLESTE.com – Prezidente Republika (PR), Jose Ramos Horta hametin relasaun diplomatika ho Vatikanu no hatoo progresu Timor Leste nia ba Papa Leao XIV.
Prezidente Republika, Jose Ramos Horta simu husi Sua Santidade Papa Leão XIV ba audiensia formal iha Palasiu Apostoliku Vatikanu, iha loron Sesta (21/11/ 2025). Enkontru nee reafirma relasaun neebe klean no exelente entre Timor Leste ho Santa Se.
Durante konversa kordial sira, Santa Sé elojia kontribuisaun vital husi Igreja Katolika ba sosiedade Timorense no ninia apoiu metin ba povu nasaun nian.
Xefe Estadu atualiza Amu Papa kona-ba dezenvolvimentu importante sira iha nível nasional no rejional, ho fokus espesial ba adezaun istorika Timor Leste nian ba ASEAN. Diskusaun sira mos kobre kona-ba progresu sosial no ekonomiku nasaun nian no hametin kompromisu mutua atu kontinua haforsa relasaun bilateral. Hafoin audiensia ho Papa, Prezidente Republika Jose Ramos Horta halao enkontru produtivu ho diplomata sira Vatikanu nian, Kardinal Sekretariu Estadu Pietro Parolin no Monseñor Paul Richard Gallagher.
Iha jestu ida neebe refleta ho kbiit espíritu nasaun nian, delegasaun Prezidente nian inklui Tia Sofia, feto faluk no negosiante kiik husi Audian.
Ninia prezensa simboliza kompromisu Prezidente nian atu garante lian hotu husi sosiedade Timorense hetan reprezentasaun iha palku mundial. Inisiativa inkluziva nee hetan elojiu pesoal husi Sua Santidade Papa Leão XIV, neebe elojia desizaun Prezidente nian atu lori reprezentante ida husi povu Timorense ba sidade Vatikanu.
Jornalista: Emerenciana Pinto
Editor: Xisto Mendonça
