KELIKAI, STLTIMORLESTE.com – Estrada husi area Saraida ba Adukele iha Suku Bualale, Postu Administrativu Kelikai, Munisipiu Baukau, hamutuk kilometru 5 kondisaun aat, iha neebe tempu udan difikulta movimentu ema ho transporte.
Komunidade Adukele, Agostinho da Costa hateten, maioria komunidade iha area Adukele moris vida agrikultor liu husi faan produtu lokal sira hanesan feuk, talas, ainanas no seluk tan hafoin hetan rendimentu sustenta ekonomia familia, maibe iha tempu udan kondisaun estrada la permite atu transporte sira too iha area refere hodi tula komunidade sira nia produtu ba merkadu.
“Iha tempu bailoron kareta bele mai, maibe tempu udan estrada kondisaun hanesan nee kareta labele tama mai, dala ruma ema moras mos ami hulan deit mak lori ba Hospital Kelikai, se sasan ruma iha ami hatun deit iha estrada mak hiit deit lori tun mai, tanba udan tahu’u makaas,” Agostinho hateten ba STL iha Adukele, Sabado (22/11/2025).
Nia komenta, komunidade hela iha area Adukele pur-volta uma kain 70, maibe kondisaun estrada aat iha neebe tempu udan difikulta komunidade sira nia movimentu ho transporte, tanba estrada refere halo ona manutensaun, maibe kondisaun nafatin aat, tanba ateru ho rai manu teen.
“Ami husu se bele Governu hadia ami nia estrada nee hodi ami buka ami nia moris, tanba iha ukun aan nee ami povu nian mak infraestrutura bazika nee,” Agostinho sujere.
Xefe Suku Bualale Gabriela da Conceição konsidera, estrada ba area Adukele kondisaun diak hela, tanba iha fulan Outubru 2025 foin halo manutensaun liu husi ateru ho rai.
“Agora ami Autoridade haree ba laos 100%, maibe pelu menus 75% ona iha tempu bailoron kareta cary kiik motor sira nee mos bele tama ba sira nia fatin rasik. Tempu udan nee mak ami seidauk hatene, ami haree dalan aat liu laiha, dalan sei diak oituan,” Gabriela hateten.
Autoridade Suku nee argumenta, komunidade sira neebe hela iha area refere moris ho vida agrikultura, maibe komunidade sira moris diak oituan, tanba iha tinan nee bele asesu ona estrada progresu manutensaun 75% bele lori sai sira nia produtu lokal ba merkadu.
Kona-ba difikulta komunidade sira nian movimentasaun ho transporte asesu estrada refere iha tempu udan nia parte seidauk hatene, tanba planu natureza nian, maibe bainhira udan boot bele difikulta komunidade sira nia movimentu.
“Ami sei iha planu bainhira orsamentu PNDS 2026 mai husi Governu direitamente ami utiliza ba komunidade bele aumenta estrada mai iha nee,” Gabriela katak.
Autoridade Suku nee kompremitidu sei kontinua hadia diak liu tan estrada diresaun husi Saraida ba Adukele iha tinan 2026 bainhira Ministeriu Administrasaun Estatal liu husi Programa Nasional Dezenvolvimentu Suku (PNDS) 2026 aloka orsamentu ba Autoridade Suku Bualale.
Entretantu populasaun neebe hela iha area Adukele hamutuk uma kain 170 resin kompostu husi Suku Baguai, Letemumo inklui komunidade husi Suku Bualale rasik.
Jornalista: Tomas Reis
Editor: Xisto Mendonça
