DILI, STLTIMORLESTE.com – Governu fo poder ba Ministra Solidariedade Sosial no Inkluzaun (MSSI), Veronica das Dores asina akordu Administrativu hodi Aplika ba Konvensaun Multilateral Seguransa Sosial ho Komunidade País Lian Portugues (CPLP).
Iha loron Sabado (22/11/2025) Governu liu husi Konsellu Ministrus delibera hodi fo poder tomak ba Ministra Solidariedade Sosial no Inkluzaun, Veronica das Dores, hodi lori Republika Demokratika Timor-Leste nia naran asina Akordu Administrativu hodi aplika ba Konvensaun Multilateral Seguransa Sosial Komunidade País Lian Portuges (CPLP) nian.
Akordu Administrativu ida-nee, tuir planu sei asina iha loron 3 de Dezembru 2025, iha Caboverde, estabelese prosedimentu operasional sira neebe nesesariu ba implementasaun Konvensaun Multilateral Seguransa Sosial CPLP nian.
Konvensaun nee ho objetivu atu promove espansaun kobertura protesaun sosial atu bele garante portabilidade direitu sosial ba sidadaun sira neebe hela iha país oioin komunidade nian no reprezenta marka signifikativu ida iha konstrusaun sidadania entre povu sira komunidade nian, no fo benefísiu neebe real no konkretu ba sidadaun sira.
Aleinde nee iha reuniaun Konselhu Ministru ikus liu, hafoin halo analize aprejentasaun husi Visi Ministru ba Fortalesimentu Institusional Saude, Jose dos Reis Magno, kona-ba prosesu transferensia pasientes hodi ba halo tratamentu mediku iha rai-liur no kona-ba montante dívida sira neebe tenke seluhamutuk ho unidade ospital internasional sira.
Konselhu Ministrus delibera hodi autoriza despeza ho valor dolar amerikanu milhaun US$ 10 hodi selu dívidas iha hospital hirak nee.
Jornalista: Emerenciana Pinto
Editora: Domingas Gomes
