BAUKAU, STLTIMORLESTE.com – Natar hamutuk hektare 100 iha Suku Buruma, Postu Administrativu Baukau Vila, Munisipiu Baukau, abandona ona durante tinan 16, tanba kauza husi debitu bee.
Xefe Suku Buruma Liborio dos Santos Freitas hateten, natar hirak neebe eziste iha Suku Buruma maioria utiliza irigasaun tradisional neebe kada tinan 3 fahe rotativa ba bee hodi kanaliza ba natar sira, maibe iha parte seluk natar hirak neebe eziste iha area Lia-Luga Suku Buruma tenke abandona, tanba impaktu husi mudansa klimatika.
“Too nia tempu atu halo natar sira nee ita labele halo hotu tanba bee labele kobre hotu natar sira, tanba kondisoens bee debitu kiik, maibe natar iha neeba nee mak bee sufisiente halo hotu rezultadu sempre diak,” Liborio hateten ba jornalista sira iha Vila Nova, Baukau, Tersa (25/11/2025).
Nia sublina, natar iha Lia-Luga funsiona tuir periodu no husi periodu ida tinan 4 foin funsiona, maibe durante periodu 4 la funsiona, tanba kauza husi debitu bee kiik no rezulta kabubu sira hahu lakon ona, tanba tinan 16 ona la funsiona.
Nia informa, natar hirak neebe eziste iha Lia-Luga Buruma pertense ba komunidade sira husi Suku Tirilolo, Bahu, Kaibada inklui Buruma rasik besik hektare 100.
“Ami nia mehi ba oin irrigasaun modobuti neebe daudaun halo hela konstrusaun ba oin kobre mos too iha neeba, tanba ami nia bee husi Uailia nia debitu agora tun la hanesan ona uluk, se irigasaun nee mak la ajuda ba oin nafatin ami nafatin hanesan tinan hirak ba kotuk,” Liborio katak
Xefe Suku Buruma nee iha esperansa boot ba konstrusaun irigasaun Modobuti neebe daudaun lao hela, tanba posibilidade bee bele kobre too area Lia-Luga hodi responde ba natar hektares hirak neebe daudaun abandona, maibe bainhira konstrusaun remata bee la kobre too area Lia-Luga, natar refere sei abandona, tanba debitu bee matan Uailia menus.
“Rekomendasaun ami nian mak Governu prezisa halo identifikasaun ba bee matan sira neebe mak area hotu-hotu inklui Buruma organiza bee nee ho diak nunee labele estraga bee kada tinan,” Liborio rekomenda
Liga asuntu nee STL tenta konfirma Diretor Servisu Munisipal Agrikultura Munisipiu Baukau, maibe laiha fatin atu fo komentariu, tanba halao hela servisu iha fatin seluk.
Jornalista: Tomas Reis
Editora: Carme Ximenes
