DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu nain tolu inisial FES, NMM no VSS, tanba komete krime hasoru ofendidu JdCM.
Tuir faktus sufisiente katak, iha loron 13 fulan Novembru tinan 2024, maizumenus tuku 1:35 loraik, ofendidu JdCM ba sosa sasan iha kios no haree arguidu FES, NMM no VSS hein hela ofendidu iha kios.
Ofendidu dehan ba arguidu sira katak, imi haluhan ona tiha katak, uluk imi nia inan aman halo hau aat los, tansa agora imi haluha los, labele rezolve? Tanba antes nee, parte ofendidu iha disputa rai ho arguidu sira.
Tanba nee arguidu FES tuda fatuk ba ofendidu kona iha nia liman. Arguidu VSS baku ofendidu nia ulun ho ai pedasuk ida hodi halo ofendidu monu ba rai.
Ida nee hamosu kanek, raan sai no bubu iha ulun, reen-toos, matan karuk no ibun, no mos moras no bubu iha kotuk laran no liman karuk.
Arguidu FES no VSS atua ho livre no ho objetivu espesífiku hodi tuda fatuk ba ofendidu nia ulun, tuku iha ulun ho ai pedasuk nuudar meiu ida atu estraga ofendidu nia isin, nunee hamosu kanek, rezultadu neebe sira reprezenta.
Sira mos hatene katak sira nia hahalok nee bandu no bele hetan kastigu kriminal. Nunee arguidu nuudar ko-autor ba krime asaltu fíziku simples, neebe define no punidu iha artigu 145, alinea I husi Kodigu Penal.
Hatan ba akuzasaun, arguidu FES deklara faktus sira nee balu los no balu sala.
Arguidu deklara, momentu neeba arguidu foti rai metan tau ba kantadeiru derepente ofendidu tuda uma, ho nunee arguidu mos foti fatuk tuda ba ofendidu kona iha nia liman no foti ai pedasuk ida baku ofendidu nia kanuruk hodi monu ba rai.
Arguidu reforsa, motivu husi ofendidu tuda uma nee, arguidu sira la hatene.
Alende nee, ofendidu deklara momentu neeba ofendidu mak tuda uluk arguidu sira nia uma, hafoin arguidu FES lori fafuk tuda ofendidu kona iha nia liman no arguidu VSS foti ai baku ofendidu nia kanuruk halo nia monu ba rai, arguidu NMM la halo agresaun hasoru ofendidu, maibe nia so haree deit.
Ofendidu deklara, motivu husi problema nee tanba ofendidu atu hola arguidu sira nia tia mak arguidu sira la simu, ho ida nee mak ofendidu tuda arguidu sira nia uma.
Rona tiha parte rua Tribunal husu Ministeriu Publiku (MP) atu tama ba iha alegasaun.
Iha alegasaun nee MP reprezenta husi Prokurador Ricardo Leite Godinho, husu ba Tribunal atu aplika pena multa ba arguidu. Enkuantu parte defeza husu ba Tribunal atu aplika pena neebe justu ba arguidu.
Tribunal rona tiha parte rua nia alegasaun, deside adia prosesu nee ba iha loron seluk, hodi tama ba iha desizaun.
Audensia julgamentu nee prezide husi Juiz Singular José Escurial, Ministeriu Publiku reprezenta husi Prokurador Recardo Leite Godinho, arguidu hetan asistensia legal husi Advogadu Pribadu Americo.
Jornalista: Terezinha De Deus
Editor: Xisto Mendonça
