DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu inisial JCX, tanba komete krime hasoru ofendidu inisial JDX.
Krime neebe akuza ba iha arguidu ho natureza semi publiku, tanba nee lei fo dalan liu husi tentativa konsiliasaun, ofendidu ba iha prosesu aseita bele dada fila fali krime nee, maibe ho razaun balu.
Tanba nee, iha sala Julgamentu Juiz singular, Julmiati Freitas deklara katak, ofendidu aseita bele dada fila, ho ida nee ofendidu deklara katak, perdua arguidu maibe husu atu iha futuru arguidu labele halo tan hahalok nee.
Ofendidu deklara katak, perdua ona arguidu, husu atu dada fila fali krime hasoru arguidu, tanba sira sei relasaun familia.
Aleinde nee, arguidu mos aseita ho pedidu ofendidu nian, no husu deskulpa ba hahalok neebe halo ona, promete sei la halo tan aktu hanesan iha Tribunal.
Rona tiha ida nee, Ministeriu Publiku no Defeza husu Tribunal atu omologa prosesu nee.
Ikus mai, Tribunal deside omologa prosesu nee no absolve arguidu husi instansia. Tribunal mos fo advertensia ba arguidu atu labele halo tan aktu hanesan nee iha futuru.
Tuir akuzasaun katak iha loron 2 fulan Janeiru tinan 2025, por volta 1h42 madrugada, arguidu ba iha ofendidu JDXP nia uma Bidau Santana Kristu Rei Dili, hodi tolok ofendidu no dehan imi mak jagoan iha nee ga.
Arguidu obriga ofendidu nia oan mane hakiak ho inisial AdS, atu loke odamatan oin tanba tauk nia mos la loke, maibe arguidu ba fali kotuk hodi hakilar loke odamatan ho nia oan mane hakiak mos loke odamatan kotuk.
Arguidu halo krime ho livre, deliberada, konsientemente no hatene katak hahalok nee proibidu no hetan pena tuir lei. Tanba nee konsidera arguidu hanesan autor material ba krime ameasa previstu tuir artigu 157 nº 1 husi kodigu penal.
Audensia julgamentu nee prezide husi Juiz Singular Julmiati Freitas, Ministeriu Publiku reprezenta husi Prokurador Estajiadu Juvencio Amaral, arguidu hetan asistensia legal husi Defensor Publiku José Maria Guterres.
Jornalista: Terezinha De Deus
Editor: Xisto Mendonça
