DILI, STLTIMORLESTE.com – Prezidente Republika (PR), Jose Ramos Horta hatete, nia sei taka matan promulga Orsamentu Jeral Estadu (OJE) 2026 neebe Parlamentu Nasional (PN) aprova ona.
Liafuan nee Prezidente Republika Jose Ramos Horta hatete ba jornalista sira iha UCT, Balide, Tersa (25/11/2025).
Nia hatete, nia sei promulga OJE ba tinan 2026 bainhira simu husi PN.
“Hau sei promulga, hau taka matan deit. Hau promulga iha Dezembru nia laran, lae konforme hau simu, hau simu ohin, ohin kedas promulga,” dehan Prezidente Horta.
Foin lalais PN halo aprovasaun iha final global ba proposta lei OJE 2026 bilhaun US$ 2.291 ho votus afavor 42, kontra 0 no abstensaun 23.
Orsamentu nee fahe ba kategoria salariu no vensimentu US$ 476,870,249, bens no servisu korrente US$ 447,904,446, transferensia publika US$ 820,710,160, kapital menor US$ 32,556,96 no kapital dezenvolvimentu US$ 436,647,379.
Iha biban nee Primeiru Ministru (PM), Kay Rala Xanana Gusmão agradese ba krítika sira husi bankada opozisaun no promete atu servisu diak ba povu no nasaun.
“Hodi Governu nia naran hau tenke agradese tebes-tebes ba diskusaun neebe konstrutiva, tanba laos mai rona deit maibe mos mai hatoo kritikas konstrutivas hodi haree, ami bele buka hadia nafatin maneira kaer ukun nee. Agradese ba vontade neebe hatudu iha loron hirak nee laos deit husi bankada opozisaun, maibe rona rasik mos husi bankada Governu. Kritikas neebe ami simu ho laran tomak hodi bele hadia, tanba ita hotu nia misaun, ita boot sira reprezenta ami buka atu servi, ita boot sira reprezenta ami buka atu servi, ami buka atu servi povu ida nee, maske ami nia kbiit la too atu halo lalais no diak liu tan,” dehan PM Xanana.
Xefe Governu hatete, Governu sei hakaas aan diak liu tan hodi halakon tiha buat hotu neebe ladun diak, la serve ba estadu no povu Timor Leste.
Jornalista: Emerenciana Pinto
Editora: Domingas Gomes
