DILI, STLTIMORLESTE.com – Prezidente Republika (PR), Jose Ramos Horta hatete, nia promulga Orsamentu Jeral Estadu (OJE) tinan 2026 iha kedas Prezidente Parlamentu Nasional nia oin, tanba durante nee Prezidente akompanha prosesu tomak, laiha problema konstitusonalidade.
Prezidente Republika (PR), Jose Ramos Horta hatoo kestaun nee ba jornalista sira iha Palasiu Prezidensial Nicolau Lobato, Bairo Pite, Kinta lokraik (27/11/2025).
PR hatete, nia haree OJE laiha problema ho konstitusionalidade, tanba nee bainhira simu husi Prezidente Parlamentu Nasional, iha tempu nee kedas Prezidente promulga.
“Ohin hau simu Prezidente Parlamentu Nasional entrega lei OJE 2026, ohin kedas iha nia oin hau asina tiha kedas, hau promulga tiha ona, balun hatete ita boot la lee, hau akompanha prosesu nee fulan hira nia laran, nee mak lo-loos Prezidente ida halo, debate lao daudaun, premeiru iha Orsamentu Jeral husi Governu ba Parlamentu nee fulan hira tiha ona, Agostu hahu tiha ona no kuandu tama parlamentu hau iha kofia kedas ona, hau lee no hau akompanha, entaun haree laiha problema konstitusionalidade, hau la presiza haruka ba hau nia jurista sira, hau mos hatene,” dehan PR Horta.
Prezidente hatete, haree linas jerais nia detalhu balun Prezidente konkorda alokasaun orsamentu, balun hatete OJE boot liu mais uluk VIII Governu iha tempu Eis Primeiru Ministru Taur Matan Ruak orsamentu boot maibe nia ezekusaun fraku los.
“Ita haree ezekusaun orsamental hahu tinan 2025 makaas intermus infraestrutura, no infraestrutura tinan ida nee boot liu tan, maibe infraestruturas laos deit estrada nasional, estrada rural, maibe infraestrutura mos hanesan eskola, eskola mos infraestrutura, laos Ministeriu Edukasaun mak halo maibe nee Obras Publikas mak halo, kanalizasaun bee, irigasaun sira nee, infraestrutura orsamentu boot tanba ida nee,” dehan PR.
Xefe Estadu hatete, husi Orsamentu Jeral Estadu balun protesta tanba orsamentu ba Ministeriu Edukasaun kiik, kiik tanba ema neebe protesta nee la lee, tanba orsamentu ba infraestrutura barak nee inklui eskola, saneamentu, bee ba eskola, telekomunikasaun, buat sira nee Prezidente lee hotu ona.
“Tanba nee bainhira Prezidente Parlamentu lori mai hau konhese tiha ona no ohin kedas hau asina para lalika lakon tempu,” dehan PR Horta.
Jornalista: Emerenciana Pinto
Editor: Xisto Mendonça
