BAUKAU, STLTIMORLESTE.com – Autoridade Postu Administrativu Kelikai komemora loron Proklamasaun Unilateral Independensia Timor Leste ba dala 50, iha Aldeia Defadae, Suku Makalaku, Munisipiu Baukau.
Prezidente Komisaun Organizadora ba Selebrasaun Loron Nasional iha Postu Kelikai, atual Xefe Suku Makalaku, Estevão S. M. Belo esplika, komemorasaun loron Proklamasaun Unilateral Independensia Timor Leste ba dala 50 nivel Postu, iha Postu Administrativu Kelikai komemora iha Suku Makalaku, tanba deside husi reuniaun Asembleia Postu Administrativu, nunee durante tinan 2025 selebrasaun no komemorasaun loron nasinal sira realiza iha Suku Makalaku.
“Ninian objetivu prinsipal neebe mak ita halao mak oinsa atu lori atividade importante sira nee mai iha povu no komunidade atu sira mos iha sentimentu pertense ba ukun aan, rezultadu mak atividade sira nee,” Estevão hateten ba jornalista sira iha ambitu komemorasaun loron Proklamasaun Unilateral Independensia Timor Leste ba dala 50 iha Suku Makalaku, Sesta (28/11/2025).
Nia sublina, komemorasaun loron Proklamasaun Unilateral Independensia Timor Leste ba dala 50 iha Postu Administrativu Kelikai hahu ho misa agradesimentu no kari aifunan inklui sunu lilin ba eroi no eroina sira nia rate nuudar fo sentidu domin ikus sira nia dedikasaun luta libertasaun nasional.
Nia konsidera, komemorasaun loron Nasional Timor nian nuudar festa popular, tanba nee komemorasaun loron Proklamasaun Unilateral Independensia Timor Leste ba dala 50 neebe realiza iha Suku Makalaku, hetan partisipasaun masimu husi komunidade sira hodi haksolok no kontente.
“Agradese no apresia tebes, tanba hanesan Autoridade Komunitaria observa no nota katak hetan apresiasaun masimu husi komunidade, tanba sira konsidera festa popular ba sira,” Estevão argumentu.
Veteranu Mario Alegria espresa, komemorasaun loron Proklamasaun Unilateral Independensia Timor Leste importante ba Timor Leste, tanba nee presiza povu haksolok no dignifika eroi no eroina sira.
“Kona-ba dia 28 Novembru uluk ami iha ai laran neeba tempu funu funu, maibe tempu aniversariu ami sempre halo tuir, bele funu mais ami halo nafatin tanba importante, bele mate maibe ukun aan nee mak importante,” nia espresa.
Komunidade Hermenijildo Martins sente kontente no agradese ba Autoridade Postu Kelikai neebe inisia loron importante komemorasaun loron Proklamasaun Unilateral Independensia Timor Leste ba dala 50 realiza iha Suku Makalaku.
“Komemorasaun dia 28 Novembru agradese tanba Administrasaun Postu Kelikai iha Suku Makalaku hakbesik ba povu hotu hotu, povu hotu hotu konsiente katak iha 1975 sira hetan sofrementu barak, maibe agora sira konsiente katak ida nee mak ita hetan independensia,” Hermenijildo katak.
Enkuantu komemorasaun loron Proklamasaun Unilateral Independensia Timor Leste ba dala 50 neebe realiza iha Suku Makalaku hetan partisipasaun husi reprezentante Prezidente Autoridade Munisipiu Baukau, Administrador Postu Kelikai, Autoridade Suku Baguia, Lakuliu, Letemumo, Bualele, Makalaku, komunidade husi Suku 5 refere inklui Autoridade Parokia Santa Terezinha Kelikai no estudante sira.
Entretantu ba serimonia komemorasaun refere, orsamentu neebe Ministeriu Administrasaun Estatal liu husi Autoridade Munisipiu Baukau aloka hamutuk US$ 750.00.
Jornalista: Tomas Reis
Editor: Xisto Mendonça
