DILI, STLTIMORLESTE.com – Relasiona ho projeitu kontratu ilegal iha RAEOA-ZEESM, Ministeriu Publiku (MP) hatama prosesu responsabilidade finanseira ba iha Tribunal Rekursu (TR), maibe ikus mai TR deside absolve. Tanba nee, MP kontinua hatama rekursu maibe too agora seidauk iha desizaun husi TR.
“Prosesu kona-ba responsabilidade finanseira nee MP halo reklamasaun no rekursu kona-ba desizaun neebe iha TR Juiza Natercia fo desizaun,” dehan PJR, Nelson de Carvalho ba jornalista sira iha Palasiu Governu, Sesta (28/11/2025).
Tuir PJR, momentu neeba Prokurador Adjuntu mak Prokurador Pascasio da Roza Alves, iha Gabinete Kontesiozu Estadu mak halo reklamasaun no rekursu. Depois iha desizaun no despaisu ida tun mai, sira hatoo nafatin maibe seidauk iha desizaun.
Nia esplika, responsabilidade finanseiru nee iha oin rua, kona-ba ida nee rekerimentu inisial no sansinatoriu nee preskreve preiskrisaun.
“Momentu MP hatoo ba iha neeba nee interogatoriu, maibe too agora desizaun seidauk tun, ami hatoo ida nee ba hirarkia, signifika ba iha Prezidente Tribunal Rekursu (TR), laos ba iha Juiza titular,” dehan PJR.
Antes nee Câmara de Contas publika rezultadu auditoria kona-ba ezekusaun finanseira iha RAEOA ZEESM iha tinan 2014 too 2016, tanba nee Ministeriu Publiku hahu prosesu responsabilidade finanseira.
Iha prosesu ida nee MP husu responsabilidade ba ema nain 14, no MP halo ida nee hafoin Câmara de Contas identifika katak, iha kontratu ilegal durante ezekusaun orsamentu alokadu ba RAEOA-ZEESM.
Maibe ikus mai Juiza konseleira husi Tribunal Rekursu deside absolve tiha kazu nee. Nunee iha fulan Dezembru 2024 MP hatoo fali rekursu ba TR hodi husu atu kontinua prosesu nee. Maibe too agora TR seidauk fo resposta ba pedidu rekursu husi MP.
Jornalista: Terezinha De Deus
Editor: Xisto Mendonça
