BAUKAU, STLTIMORLESTE.com – Autoridade Suku Kaibada, Postu Administrativu Baukau Vila, Munisipiu Baukau, utiliza orsamentu husi Programa Nasional Dezenvolvimentu Suku (PNDS) 2025, hodi reabilita drenazen.
Xefe Suku Kaibada, Cosme da Costa Lopes informa, iha tinan 2025 Autoridade Suku Kaibada hetan alokasaun orsamentu husi Programa Nasional Dezenvolvimentu Suku hamutuk US$ 30,993.00 no Autoridade Suku, implementa projetu reabilitasaun drenazen husi area Uaidalamori too Uainioma hamutuk metru 675.
Nia salienta, implementasaun projetu refere tuir planu prioridade Aldeia Uanioma nian, tanba hakarak oferese bee ba natar no toos.
“Drenazen nia sei responde laos asegura udan been deit, maibe nia sei fo oportunidade ba ita nia natar karik durante nee ita husik deit, entaun aproveita oportunidade ho orsamentu minimu liu ita responde oituan oituan,” Coste hateten ba jornalista sira, iha Uainioma Kaibada, Segunda (01/12/2025).
Nia sublina, bainhira projetu reabilitasaun drenazen refere finaliza sei fo benefisiu ba komunidade agrikultores sira iha Suku Kaibada liu liu komunidade sira iha Aldeia Uanioma, tanba bele utiliza drenazen refere hodi kanaliza bee ba toos no natar hodi aumenta numeru produsaun hadia ekonomia familia sustenta oan sira ba eskola.
Maibe antes projetu refere finaliza fo ona benefisiu uluk ba komunidade trabalhador sira iha projetu refere, tanba dutante implementasaun projetu refere sira hetan ona orsamentu natoon sustenta ekonomia familia.
“Trabalhador iha nee 23 pesoas inklui feto mane, tanba ita labele uza deit mane, maibe feto mos iha oportunidade no sira iha vontade servisu, ita enkaixa sira iha laran inklui mos familia difisiensia mos servisu iha laran,” Cosme argumentu.
Iha fatin hanesan trabalhador, Januário António de Sá agradese ba implementasaun projetu reabilitasaun drenazen, tanba bele hetan rendimentu trabalhador nian no bainhira projetu refere finaliza sei fo vantajen ba komunidade sira iha Aldeia refere.
“Ida nee bele asegura ami nia estrada, uma neebe besik estrada nee dala ruma bee mos tun ba natar sira,” Januário komenta.
Entretantu projetu refere hahu iha fulan Agostu 2025 no tuir planu finaliza iha fulan Outubru 2025, maibe too ohin loron seidauk finaliza, tanba razaun tarde iha mobilizasaun material konstrusaun.
Jornalista: Tomas Reis
Editora: Carme Ximenes
