DILI, STLTIMORLESTE.com – Polísia Nasional Timor Leste (PNTL) liu husi Diresaun Tranzitu Seguransa Rodoviária Nasional (DTSRN), husi fulan Janeiru too Outubru tinan ida nee rejistu kazu asidente trafiku hamutuk 1.870.
Diretor Tránzitu Seguransa Rodaviaria Nasional, Superintendente Xefe Polísia António Mauluta dehan, tranzitu nasional bazeia ba rekapitulasaun dadus sira mai husi Komandu Munisipiu sira Janeiru too Outubru ba kazu asidente hamutuk 1.870. Husi kazu nee kanek kaman kompostu husi ema nain 158, kanek grave iha ema nain 332, rezulta ema nain 86, investigasaun final 25, sei iha hela faze investigasaun hamutuk 970, ba ona tribunal hamutuk 71 no rezolve familia hamutuk 804.
Alende ida nee iha kazu asidente únika hanesan ema sira monu mesak ho motor laiha suspeitu nee mak iha kazu 25.
“Husi asidente sira nee ita halo avaliasaun husi kazu sira nee, neebe mak ita haree aas liu mak husi fator umanu. Iha fator umanu iha 85%, ita haree fali fatór kondisaun kareta no motór ladiak ida nee 5%, fatór dalan 5% no mós fatór natureza 5%,“ esplika nia ba jornalista sira iha nia knaar fatin Komandu Jerál PNTL Kaikoli, Segunda (01/12/2025).
Nia informa, haree ba numeru fator umanu neebe kontribui makas ba iha asidente, ho nunee mak DTSRN oras nee dadaun servisu hamutuk ho Diresaun Nasionál Transporte Terrestre halo sensibilizasaun konaba tranzitu rasik iha Munisipiu Baukau, Manufahi, Ermera no Kovalima.
“Ita nia sensibilizasaun nee ba iha joven sira, ba ita nian estudante sira neebe husi nivel sekundária nomos ba iha ita nian kondutor sira, liliu ba iha disipliña atu uza transporte nomós disipliña uza transporte atu tama ba iha estrada públiku,” nia deklara.
Nia hatutan, iha sensibilizasaun nee mos esplika kona-ba sinais tránzitu, liliu atu esplika ba joven sira nomos ba kondutor sira liga ba sinais tranzitu veritkal no orizontal no ba iha regra semáforu nian.
Komandante Mauluta hatutan, programa sensibilizasaun ba joven, estudante sira sekundaria no kondutor sira ba iha lei seguransa rodaviaria nee sei kontinua, hodi nunee ema bele utiliza motor no kareta ho kuidadu.
Jornalista: Jeniche da Costa
Editora: Domingas Gomes
