DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu ho inisial JD, tanba komete krime hasoru lezadu inisial MdCP hanesan oan.
Arguidu ho lezadu MdCP nuudar oan ho aman rasik ofendidu sei depedente ekonomikamente ba arguidu nuudar aman.
Iha loron 10/7/2023, ofendidu la ba eskola, tanba nee mak iha dia 11/7/2023, lokraik tuku 17:30, bainhira ofendidu fo han hela fahi iha uma oin, arguidu bolu nia dehan” Ajo mai lai” tanba nee mak ofendidu mos ba besik arguidu neebe toba hela iha has mahun okos.
Bainhira ofendidu ba besik, arguidu husu dehan” nusa mak horiseik o la ba eskola”, maibe ofendidu nonok deit, nunee arguidu kaer ofendidu habit metin iha kakorok too ofendidu dada iis susar. Arguidu mos tuku tan dala ida iha ofendidu nia kotuk laran rezulta moras.
Arguidu abitua hemu tua too lanu, nunee kuandu lanu ona nia sempre hirus, siak no baku nia oan sira iha uma laran, inklui ofendidu.
Arguidu halo hahalok sira nee ho forma neebe livre, konsientemente no la ignora karakter sensuravel nia konduta, no hatene katak nia hahalok nee hamosu moras, bubu ka bele kanek iha ofendidu nia isin. Arguidu hatene mos katak ofende iha ema seluk nia isin tuir lei bandu no hetan kastigu, tanba krime.
Tanba nee konstitui arguidu, nuudar autor material, ho forma konsumadu ba krime Violensia Domestika ho forma ofensa ba integridade fizika simples neebe previstu no punidu tuir artigu 145 numeru 1 Kodigu Penal, konjuga ho Lei kontra Violensia Domestika numeru 7/2010, 7 Julhu.
Hatan ba akuzasaun nee, arguidu konfesa imparsial katak, momentu neeba arguidu kondisaun lanu, no arguidu baku ofendidu tanba laba eskola.
Arguidu rekonhese nia hahalok nee la diak, hahu husi neeba mai too agora la halo tan ona agresaun ba ofendidu, no la hemu ona tua.
Banhira Tribunal konfirma ba lezadu deklara katak, arguidu ema neebe gosta konsumu tua, maibe agora la konsumu ona. Lezadu mos rekonhese, arguidu halo duni agresaun hasoru lezadu.
Rona tiha ida nee, iha alegasaun Prokurador deklara katak, arguidu nia hahalok nee presiza halo prevensaun. Tanba nee husu Tribunal atu aplika pena prizaun fulan ida, suspende ba tinan ida. Enkuantu defeza haree katak, arguidu arepende ona, tanba nee husu Tribunal atu aplika pena neebe justu.
Rona tiha alegasaun adia ba loron seluk hodi rona desizaun.
Audensia julgamentu nee, prezide husi Juiz Fransisca Cabral, Ministeriu Publiku reprezenta husi Prokurador Bartolomeo de Araujo, arguidu hetan asistensia legal husi Defensor Publiku nain ida.
Jornalista: Terezinha De Deus
Editora: Carme Ximenes
