DILI, STLTIMORLESTE.com – Prezidente Tribunal Rekursu (PTR), Afonso Carmona hatete, durante nee Inspetor halao hela inspesaun no avaliasaun ba Juiz sira nia servisu, hodi halo promosaun ba iha kareira Juiz nian, husi terseira klase ba iha segunda klase, no husi segunda klase ba iha primeira klase no Juiz Konselheru no mos Dezembargador.
“Ohin hau koalia ona ho Inspetor hahu Dezembru ita koalia ona kona-ba Juiz sira se maka primera klasse, se maka segunda klasse no se maka terseira klasse, sira nia rezultadu nee atu Governu mos aprova osan,” dehan Prezidente Tribunal Rekursu, Afonso Carmona ba jornalista sira, iha Kaikoli, Dili, Segunda (01/12/2025).
Nia hatutan, haree mos ba iha Juiz Konselheru, no Juiz Dezembargador iha Tribunal Rekursu (TR), aprova hotu ona.
Maibe promosaun ba Juiz sira, ida nee servisu inspesaun nian lao hela, no husu atu iha fulan Dezembru nee Inspetor bele informa ona ba PTR, kona-ba Juiz neebe maka sei ba iha Supremu no ba iha dezembargador. PTR la tama ida, tanba nia parte maka instala no lori deit Juiz sira ba.
Nia dehan, lei neebe iha seidauk aplika maibe vigor ona no dehan, Juiz nain 9 ba iha Tribunal Rekursu (TR) no nain hitu (7) ba iha supremu. No husi kareira haat, husi liur nain tolu, tanba nee maka agora sei haree uluk Juiz kareira nain sanulu resin tolu (13), depois maka sei haree fali husi liur hamutuk nain sanulu resin neen (16).
Iha inisiu fulan Janeiru sei entrega ba iha Komisaun hodi halo selesaun, no nain tolu mai husi liur bele dosente sira neebe ema tau fiar, mai husi Advogadu no Ministeriu Publiku, ka Defensor Publiku sira neebe iha grau lisensiatura direitu.
“Kona-ba avaliasaun servisu simu ona Juiz nain sanulu resin ida (11), maibe seidauk simu nia rezultadu sira dehan deit ema nain 11 nia naran halo avaliasaun tiha ona, maibe Inspetor ida uluk tanba nee maka sei reviu fali ho Inspetor foun nee iha problema ruma ka lae maibe naran ita seidauk hatene.
Tuir nia, membru Konselhu husu atu iha fulan Dezembru nee nia laran, nain 13 avaliasaun nee tenke konfirma sira nia rezultadu atu promulga,” dehan PTR, Afonso.
Iha fatin hanesan, Jurista Jose Maria Guterres dehan, promosaun ba Juiz importante tebes, tanba Juiz balu servisu kleur ona seidauk iha promosaun ba sira nia kareira.
“Hau hanoin promosaun ba Juiz importantes tebes, ita haree Juiz balu servisu kleur ona merese atu hetan promosaun,” dehan nia.
Nia dehan, atu hetan promosaun tenke prense ba regra neebe iha, no kabe ba iha ispetor, tanba nee husu atu tau konfiansa ba iha inspetor nia servisu.
Jornalista: Terezinha De Deus
Editora: Carme Ximenes
