BAUKAU, STLTIMORLESTE.com – Fundasaun Lafaek Diak hamutuk ho voluntariu husi Rotáry Margareth River Australia halo promosaun saude no fahe fasilidade estadu ba estudante sira, iha eskola Ensinu Baziku Filial Katolika Uaimanuboe, Suku Uailili, Postu Administrativu Baukau Vila, Munisipiu Baukau.
Mediku Dentista Dalivio Raimundo da Silva Gaio Nicolao esplika, Fundasaun Klinika Lafaek Diak nuudar parseiru Governu nian kumpri misaun no vizaun implementa programa klinika movel ba area remotas sira, hodi halo promosaun saude ba estudante no komunidade sira hodi prevene aan husi moras sira, tanba iha tempu udan fasil komunidade sira hetan moras hanesan diarea no seluk tan.
“Ohin loron ami mai ho voluntariu husi Australia Rotáry Margareth River sira mai hakarak fahe prezente ba estudante sira iha eskola Uaimanuboe. Agora tempu udan ami mai halo promosaun liu liu diarea ho kabun moras ba ita nia estudante sira nomos komunidade,” Dalivio hateten ba jornalista sira, iha eskola Uaimanuboe, Tersa (02/12/2025).
Nia sublina, saude importante ba komunidade liu liu labarik kiik sira, tanba iha tempu udan moras diarea persentajen makaas, nunee prezensa ekipa objetivu atu halo prevensaun liu husi promosaun saude hodi moras diarea labele afeta ba labarik kiik sira.
Nia fundamenta, promosaun saude neebe ekipa implementa iha eskola Uaimanuboe mak hanesan, fo hanoin ba estudante sira bainhira kaer ona sasan foer tenke fase liman molok han, nunee labele afeta ba moras diarea, tanba bainhira komunidade liu liu labarik idade kiik sira kaer sasan foer la fase liman no kaer hahan hodi han, fasil liu afeta ba diarea.
“Ami mos mai fo hanoin sira oinsa fase liman, halo distansia sosial han hahan nutrisaun, atu nunee prevene sira husi moras agora daudaun hadaet hela iha komunidade,” Dalivio akresenta.
Aleinde mos nia hateten, prezente neebe ekipa voluntariu husi Australia fahe ba estudante sira, mak fasilidade estudu nian atu estudante sira utiliza iha prosesu aprendizajem.
“Sira fahe sasan sira kona-ba eskola nian, livru kadernu pasta sapeu bola no seluk seluk tan,” Dalivio informa.
Iha fatin hanesan Koordenador Eskola Uaimanuboe, André Braz Belo sente kontente no agredese ba apoiu husi ekipa Fundasaun Lafaek Diak, tanba bele ajuda ona desimina informasaun no fahe fasilidade estadu ba estudante sira.
“Ohin sira simu prezente husi maluk sira Australia hau agradese, tanba laiha liafuan murak ruma ba maluk sira husi Australia. Iha promosaun saude sira koalia kona-ba diarea nee mak ohin Lafaek mai fo hatene ba hau nia estudante sira katak, bainhira atu han buat ruma tenke fase liman,” André katak.
Andre informa, apoiu fasilidade estadu nian ba estudante sira mak hanesan lapis kores, lapis, lapizeira, pasta, sapeu no seluk tan, maibe apoiu refere bele fasilita ona estudante sira iha prosesu aprendizajem anu letivu 2026 mezmu natoon.
Nia apresia, planu ekipa implementa promosaun saude iha eskola Uaimanuboe bele motiva ona estudante sira atu kuida saude, liu liu fase liman molok han nunee evita moras diarea.
Enkuantu estudante Fabrijio da Costa Castelão sente kontente, tanba hetan fasilidade estadu nian husi ekipa Lafaek Diak no agradese, tanba bele hetan informasaun foun kona-ba prevensaun moras diarea nian.
Entretantu total estudante neebe partisipa iha promosaun saude no hetan fasilidade, estadu husi Lafaek Diak no Rotáry Margareth River Australia hamutuk nain 48 kompostu feto mane.
Jornalista: Tomas Reis
Editora: Carme Ximenes
