DILI, STLTIMORLESTE.com – Tribunal Judisial Primeira Instansia Dili (TJPID) halao julgmantu ba krime ofensas integridade fizika simples, ho forma violensia domestika neebe mak komete husi arguidu inisial MG.
Tuir akuzasaun Ministeriu Publiku katak, iha loron 22 fulan Janeiru tinan 2025, por volta 15h30, fatin Bebora Dili, ofendida AMG husu fali osan US$ 75,00 neebe entrega ba iha arguidu lori ba selu sira nia oan nia eskola.
Ofendida husu fali osan, maibe arguidu hatan dehan depois mak “Hau selu tiha, maibe ofendida mantein husu tanba atu lori ba selu oan sira nia eskola,” hatete akuzasaun nee.
Arguidu hatan ba iha ofendida hodi dehan, oan sira nee bele ba eskola, maibe sıra la selu ida, tamba nee ofendida mai lori liman buti arguidu nia ibun atu nia labele fo malisan ba oan sira.
Konsekuensia husi agresaun nee halo ofendida sente moras iha fatin atinjidu no ba halo tratamentu.
Tanba nee, konsidera arguidu hanesan autor material ba krime ofensas integridade fizika simples tuir artigu 145 n° 1 kodigu penal ho forma violensia domestika.
Iha sala julgamentu, arguidu MG konfesa ba Tribunal katak, faktus neebe mak lee sai husi Juiz singular nee, balu sala no balun loos tanba iha momentu nee arguidu fo tiha ona osan ba ofendida, maibe ofendida husu nafatin ba arguidu, nunee arguidu nervozu baku ofendida, tanba osan atu selu nia oan nia eskola nee arguidu tau tiha ona.
Arguidu deklara katak, hafoin problema nee, akontese arguidu ho ofendida dame malu no kontinua moris hamutuk too mai agora. No arguidu rekonese katak hahalok neebe nia halo nee la diak no arepende tebes.
Hafoin Tribunal rona deklarasaun hosi arguidu MG, Tribunal la rona deklarasaun husi lezada tanba lezada ba vizita familia iha Munisipiu Aileu, nunee Tribunal deside atu tama ba alegasaun.
No iha alegasaun nee, Ministeriu Publiku husu Tribunal atu aplika pena multa ba arguidu MG. No parte Defeza husu Tribunal aplika pena adekuadu ba arguidu atu iha futuru labele repete tan.
Hafoin rona hotu, Tribunal deside adia ba loron 11 fulan Dezembru tinan nee 2025 hodi rona desizaun.
Iha audensia julgamentu nee prezide hosi Juiz, José Escurial, Ministeriu Publiku reprezenta husi Prokurador, Nelson Magno no arguidu hetan asistensia legal Defensor Publiku, Estaquio Guterres.
Jornalista: Terezinha De Deus
Editora: Carme Ximenes
