BAUKAU, STLTIMORLESTE.com – Autoridade Postu Administrativu Kelikai Antigu, Munisipiu Baukau, simu ona viatura foun no sei utiliza ba servisu hodi lori besik programa Governu nian ba komunidade sira.
Administrador Postu Kelikai Antigu, Francisco Matias Gusmão “Junior” agradese ba Governu Sentral no Munisipiu, tanba liu husi esforsu sira bele apoiu ona viatura foun ba Servisu Administrasaun Postu nian, neebe sei utiliza ba servisu operasional Postu nian liu liu koresponde ba nesesidade komunidade sira nian iha sirkuntansia Kelikai Antigu.
“Transporte nee hanesan fasilidade atu fasilita ita atu transmite governasaun ida nee too kraik hau hanoin iha fasilidade atu fasilita ita, mais hanesan Administrador Postu Kelikai Antigu depois de simu mandatu provizoriu ita lao ho motorizada, maibe tempu ida nee bele hetan viatura ida,” Junior hateten ba STL, iha Vila Nova Baukau, Kuarta (03/12/2025).
Nia realsa, hafoin reativa Postu Kelikai Antigu no asume knaar Administrador infrenta difikuldade barak, tanba kondisaun estrada aat, maibe durante nee utiliza deit motorizada hodi lori besik programa Governu nian ba komunidade iha area remotas sira.
Nia sublina, mesmu durante nee infrenta menus fasilidade hanesan viatura, maibe kontinua iha ba komunidade sira, tanba sempre hakbesik aan ba komunidade sira hodi rona preokupasaun no problema hotu neebe komunidade iha baze infrenta.
Tanba nee agrasede liu tan ba Governu nia esforsu neebe apoiu ona viatura foun ba Autoridade Postu Kelikai Antigu no kompromete,?sei utiliza deit viatura refere ba interese estadu.
“Hau hanesan Administrador Postu desde inisiu hau utiliza motor, atividade Governu hau koresponde ho viatura Governu, atividade privadu hau responde ho viatura privadu, mais em prinsipiu viatura sira neebe atribui ba hau hanesan Administrador Postu sasan sira nee, maski estadu nian mais hau sei utiliza kuidadu hanesan hau nia rasik hodi fasilita ita ba objetivu neebe ita atu ba, neebe sasan sira nee hau kuida no responsabiliza karik mandatu tuir hau entrega fila fali ba ida neebe mai troka hau,” Junior deklara.
Enkuantu Prezidente Autoridade Munisipiu Baukau, Veneranda Lemos hateten, dezisaun apoiu viatura foun nuudar pasu importante ida atu reforsa kapasidade operasioanl Servisu Munisipal hodi bele melhora liu tan prestasaun servisu publiku nian, tanba viatura refere nuudar instrumentu esensial atu fasilita movimentu funsionariu sira nian ba iha terenu hodi halo supervizaun ba projetu sira, nomos halao atividade sosial no ekonomia liu husi resposta emerjensia iha nivel Munisipiu.
“Utiliza viatura sira nee tuir padraun no normativu sira neebe estabelese iha partrimoniu estadu nian, ami garante katak viatura sira nee sei uza deit ba objetivu ofisial ho responsabilidade no efisiensia, evita kualker abuzu ka uza la tuir regras,” Veneranda komenta.
Nia argumenta, Autoridade Munisipiu Baukau sei implementa sistema jestaun no manutensaun rigoroza hodi asegura viatura sira no funsionamentu, diak hodi kontribui signifikativamente ba melhoria prestasaun servisu publiku nian no dezenvolvimentu sustentavel iha Munisipiu Baukau.
“Simu karreta ida nee favor uza ho responsabilidade no uza hanesan, ita nia rasik kuidadu sasan estadu nian atu ita labele tinan tinan hasai osan haree ba veikulu, se veikulu ida ita kuidadu gasta osan barak depois osan sira nee ita halo buat ruma labele,”dehan nia.
Veneranda husu ba dirijente sira iha Servisu Administrasaun Munisipiu Baukau, atu utiliza viatura estadu nian ho kuidadu no sente, pertense ba fasilidade sira nee nunee bele utiliza ba tinan naruk.
Entretantu viatura foun refere, ofisialmente iha loron 02 Dezembru 2025 Governu liu husi Ministeriu Administrasaun Estatal, entrega viatura foun hamutuk unidade 8 ba Autoridade Munisipiu Baukau neebe Ministru Administrasaun Estatal rasik entrega unidade 1 ba Autoridade Postu Kelikai Antigu, 1 ba Postu Matebian, 1 ba Postu Baguia enkuantu viatura 5 seluk destaka iha Diresaun Servisu Munisipal sira.
Jornalista: Tomas Reis
Editora: Carme Ximenes
