VIKEKE, STLTIMORLESTE.com – Tempu udan estrada husi Vikeke Vila ba Postu Administrativu Uatulari no Uatucarbau nakfilak ba tahu dodok.
Tuir observasaun STL iha Kuarta (03/12/2025) nota katak, estrada husi Viqueque Vila ba iha Posto Administrativu 2 hanesan Uatulari no Uatucarbau iha tempu udan nakfilak ba mota kiik no tahu dodok, tanba nee bainhira ema halo viajen ho motor no kareta presiza halai ho kuidadu tanba rai namdoras nakonu ho tahu dodok.
Viajen husi Dili too Baucau sente diak maibe too iha Ponte Asalaitula Ossu estrada komesa ladiak ona, nakonu ho fatuk i rai rahun, too Ossu igreja estrada ema nahe ona aspal maibe oituan dei too Loihuno sorin tama Vikeke Vila, maibe husi Naeboruk mai Raitahu Beacu too Uatulari no Uatucarbau estrada aat liu, tanba estrada klaran nakonu ho bee no tahu dodok.
Iha estrada nakonu ho bee nalihun, hanesan mota sira iha estrada klaran, no estrada kuak ba mai, no nakonu ho tahu dodok neebe namdoras. Tanba nee ema neebe uza motor ho Kareta husi fatin nee tenke halai kuidadu.
Estrada refere tempu bailoron nakonu ho rai rahun suar no tempu udan nakfilak ba mota kiik no tahu dodok, ida nee mak kondisaun estrada husi Viqueque Vila ba postu rua.
Liga ho problema estrada reprezentante povu iha Uma Fukun Parlamentu Nasional, Deputadu Dario Madeira nuudar Vikeke oan sempre levanta iha Parlamentu Nasional, tanba estrada husi Viqueque Vila ba Postu Adminsitrativu Uatulari no Uatucarbau aat tebes.
Jornalista: Emerenciana Pinto
Editora : Domingas Gomes
