DILI, STLTIMORLESTE.com – Tribunal Judisial Primeira Instansia Dili (TJPID) liu husi despaisu ba prosesu Primeiru Interogatoriu, deside aplika medida Prizaun Preventiva (PP) ba arguidu inisial VAC.
Arguidu lori mai iha Tribunal, tanba hamate vitima nain rua Xefe Aldeia Metir Miguel Coreia do Santos idade 50, ho vitima Augusta de Deus hanesan arguidu nia fen, neebe akontese iha Aldeia Metir, Suku Fatumasi, Postu Administrativu Bazartete, Munisípiu Likisa.
Nunee Ministeriu Publiku (MP) promove krime rua ba iha arguidu, Homesidu Agravadu no Krime Arma Branka.
Iha Tribunal Juiza turnu Zulmira Auxiladora rona tiha arguidu nia deklarasaun, ikus mai deside aplika medida Prizaun Preventiva ba arguidu.
Rona tiha despaisu Tribunal nian, Defeza husi arguidu nian deklara, nia parte mos konkorda ho despaisu Tribunal nian.
“Krime neebe imputa ba arguidu Homesidu Agravadu tanba nia fen neebe gravida, inklui mos Xefe Aldeia ita bele konsidera nain tolu maka mate, aumenta ho krime Arma Branka,” dehan Defensor Publiku, Anzelmo Pinto Akara ba jornalista sira, iha Tribunal Dili, Kuarta (03/12/2025).
Defeza hatutan, arguidu lori besi kanu inklui mos katana ka samurai neebe iha, bazeia ba fotografia neebe iha. No iha alegasaun husi parte Ministeriu Publiku (MP) husu Tribunal atu aplika medida Prizaun Preventiva.
Maibe Defeza mos konkorda ho pedidu MP nian, tanba haree ba rekejitu jerais sira iha artigu 183 husi Kodigu Prosesu Penal, Defeza mos haree prense ba iha perigu de fuga, pedidu kontinuasaun ba atividade kriminoza no mos ba iha perturbasaun, tanba nee defeza mos konkorda.
No iha parte ida, Defeza haree katak arguidu sofre hela moras mental, tanba nee maka iha audensia nia laran arguidu konfesa, maibe saida maka arguidu deklara Tribunal, MP, no mos Defeza la entende, tanba husu buat ida nia hatan fali oin seluk.
Defeza afirma, iha alegasaun mos konkorda ho medida koasaun neebe iha, maibe Defeza prefere liu ba iha medida seguransa ba internamentu, maibe defaktu desizaun tun ho medida Prizaun Preventiva.
Kuandu arguidu iha liur bele fo perigu ba nia an, no mos ba ema seluk, no defeza hare arguidu iha sinal ba moras mental.
Audensia julgamentu nee prezide husi Juiza Zulmira Auxiladora, Ministeriu Publiku reprezenta husi Prokurador, Domingos Barreto, arguidu hetan asistensia legal husi Defensor Publiku, Anzelmo Pinto Akara.
Jornalista: Terezinha De Deus
Editora: Carme Ximenes
