DILI, STLTIMORLESTE.com – Kazu baku funsionariu Bombeirus (lezadu AdJMP) tama ona ba iha faze alegasaun ba arguidu nain tolu inisial MM, LM no RMT.
Iha alegasaun nee Prokurador Bartolomeo de Araujo deklara katak, kazu nee rona ona deklarasaun husi arguidu nain tolu, inklui mos lezadu no sasin sira.
Lezadu mos konfesa hetan agresaun husi arguidu MM, maibe lezadu rekonhese katak lezadu maka tebe uluk arguidu.
Haree ba deklarasaun sira nee hotu, Prokurador deklara katak ba krime Obstrusaun Autoridade Publika la prense. Maibe ba iha krime Ofensa Integridade Fisika Simples prense, ho nunee husu Tribunal atu kondena arguidu MM ba krime Ofensa Simples ho pena multa US$ 20.
Ba arguidu nain rua LM no RTM, Prokurador husu Tribunal atu absolve arguidu nain rua, husi krime neebe Ministeriu Publiku (MP) imputa.
Enkuantu Defeza arguidu sira nian, Advogadu Privadu, Joao Corte Real deklara, arguidu sira kopera ho Tribunal, tanba nee husu atu tetu sirkunstansia hotu, atu aplika pena neebe justu.
Rona tiha alegasaun, Tribunal adia ba loron seluk hodi rona desizaun.
Tuir faktus katak, iha loron 27/1/2021, lokraik tuku 15:00, lezadu ho sira nia equipa simu informasaun husi komunidade husi area Golgota katak, iha karreta vaskolante ida tula foos bakufila iha neeba, no sira husu Bombeirus ninia apoiu, nunee lezadu ho nia kolega nain 5 (grupu ida) ba iha fatin neebe karreta baku fila ba, sira nain 6 ba atu ajuda dada loos fali karreta neebe maka bakufila. Maibe antes sira too iha neeba, ema barak maka iha tiha ona fatin refere.
Kuandu lezadu ho nia ekipa atu halo ona sira nia servisu, arguidu MM maka koalia barak dehan ami la presiza ona Bombeiros”, tanba nee maka lezadu ba besik arguidu MM hodi hateten ba nia katak, se hanesan nee ami fila ona, tanba ami mai bazeia ba informasaun neebe maka hato ba iha edefisiu,” hatete akuzasaun nee.
Hafoin lezadu hateten nunee, arguidu MM dudu kedas iha lezadu nia hirus matan halo lezadu atu monu ba kotuk, maibe la konsege tanba iha kolega balun maka satan netik husi kotuk.
Iha altura nee, lezadu nia ain sorin los mos hit sae, maka arguidu MM kaer iha lezadu nia ain nee atu halo monu lezadu, maibe nia kolega maka tahan nafatin, no la akontese tan agresaun ruma husi arguidu.
Katak, tanba impedementu husi arguidu ho suspeitu deskonhesidu sira maka lezadu ho ninia ekipa Bombeirus mos aruma sira nia sasan tau iha karreta atu fila ona, maibe arguidu MM, RMT, LM, ho tan suspeitu deskuinesidu sira ema barak ba atake lisuk fali lezadu. Balu kaer ai, fatuk tuda no baku no balu mos tuku tebe kona iha lezadu nia hirus matan, liman sikun no kona mos lezadu nia ulun sorin karuk too kanek ran sai barak.
No lezadu ninia situasaun refere, maka lezadu nia kolega sira lori kedas ba sentru saude Komoro hodi hetan tratamentu mediku no suku.
Iha mumentu nee lezadu nia kolega sira seluk la hetan agresaun ruma husi suspeitu sira, maibe lezadu mesak. No lori tiha ona lezadu ba sentru saude maka foin Polisia ba iha fatin akontesimentu hodi kaer arguidu sira.
Arguidu MM dudu no tebe kona iha lezadu nia ain tur sorin loos. No arguidu LM maka kaer kapasete baku ba lezadu nia ulun too kanek, no arguidu RMT maka tuku kona iha lezadu hasan sorin loos.
Arguidu sira nia asaun nee maka lezadu ho nia ekipa Bombeirus la dada karreta neebe baku fila no tula fali lezadu fila fali tiha deit ba sira nin servisu fatin.
Bombeirus ba halao servisu Estadu nian atu ajuda komunidade neebe husa ajuda, nunee arguidu sira impede too hamosu lezadu hetan kanek no moras.
Kona-ba problema refere, iha dia 29/1/2021, dadersan Xefe Suco Comoro, Xefe Aldeia ho delegadu Suku nian, ba deit iha lezadu nia servisu fatin husu tiha ona diskulpa, no promete atu hasoru malu hodi rezolve tuir dalan familia tanba sira mesak sei vizinho.
Arguidu RMT, LM no MM hakarak ho intensaun impede no halo agresaun fizika kontra fuasionarius Bombeirus ninia servisu, hodi kauza lezadu hetan kanek, bubu, moras iha zona atinjidu.
Arguidu sira hatene katak, impede funisonarius kompetente too la bele halao sira nia funsaun, nuudar aktus krime obstrusaun ba autoridade publika, tanba nee kontra lei no hetan kastigu penal.
Ho nunee, arguidu sira hanesan autor Material ho forma konsumada, hodi pratika krime ida obstrusanu ba autoridade publika neebe previstu no punidu tuir artigu 243 husi Kodigo Penal.
Audensia julgamentu nee, prezide husi Juiz Kolektivu, Ivan Patrocenio, Arjentino Nunes, Juiz estajiadu nain ida, Ministeriu Publiku reprezenta husi Prokuradora, Remizia De Fatima, arguidu nain tolu hetan asistensia legal husi Advogadu Privadu, Joao.
Jornalista: Terezinha De Deus
Editora: Carme Ximenes
