DILI, STLTIMORLESTE.com – Primeiru Ministru (PM), Kay Rala Xanana Gusmão tun direta no fo orientasaun hodi taka jogu online Lotaria Dragon neebe lokaliza iha Praia dos Coqueiros, Dili.
Prezensa Primeiru Ministru nian iha terenu tanba durante debate Projetu Proposta Lei (PPL) no. 23/VI (3a) kona-ba Orsamentu Jeral Estadu (OJE) tinan fiskal 2026 iha Parlamentu Nasional (PN) simu liafuan mafiozu, tanba Governu husik jogu online kontinua eziste. Ho ida ne’e mak Governu halo tiha rezolusaun hodi taka jogu online nee, maibe ema sei joga nafatin.
“Hau mak responsavel ba Servisu Nasional Intelejensia (SNI) no PSIK. Sira nee iha hau nia okos hodi hatan ba problema sira neebe sosiedade hasai iha Parlamentu loron-loron deit dehan hau mak mafiozu boot, ema lakon osan barak. Tanba ida nee mak mai haree katak, iha nee sei joga nafatin,” PM Xanana hateten liu husi nota komunikadu neebe STL Asesu husi media PM, Kinta (04/12/2025)
Xefe Governu haree katak, ema sira neebe loke jogu sira nee iha ligasaun direta ho Indonezia, Rusia, Brazil, Europa. Tanba nee mak polisia mai iha nee dezliga deit, maibe iha rezolusaun Governu nian neebe publika ikus nee dehan katak sobu.
“Hau mai kedan iha nee atu fo hanoin ba hotu-hotu katak iha desizaun dehan taka la taka mak deskobre sobu hotu, ida nee husi SNI no PSIK. Hau ba Prokuradoria Jeral Repúblika maibe sira la book aan, servisu kala barak tebes-tebes, tanba nee hau rasik mak mai. Nuudar Xefe Governu bá iha Parlamentu Nasional hau rona liafuan barak tebes-tebes, hau senti katak tenke iha desizaun urjente no lalais,” Xanana Gusmão hateten.
Liu husi Diresaun Servisu Investigasaun Kriminal (DSIK) iha Kuarta (03/12/2025), ezekuta mandadu husi Ministeriu Publiku (MP) halo buska no apreensaun ba jogu Lotaria Grand Dragon neebe lokaliza iha Praia dos Coqueiros no mos nia sukursal iha Timor Plaza.
Iha prosesu buska no apreensaun nee, PNTL lidera hosi Komandante Operasaun Superintendente Asistente Polisia Mouzinho Tavares Correia, asegura prova ka evidensia sira, hanesan telemovel 15, kumputador 10-resin, pasaporte, kupon ho osan kuaze milhaun US$ 1 iha brankas, inklui halo identifikasaun ba traballador balun no halo detensaun ba jerente nain tolu.
Ezekusaun ba buska nee hetan mandatu husi Ministériu Publiku liu-hosi Prokuradór João Marques ho Numeru Uniku Kriminal (NUC, sigla portugés) 0389/2025.PNSIC.
Jogu Grand Dragon Lotaria Estadu Timor-Leste liu-hosi VIII Governu Konstitusional legaliza iha tinan 2022.
Jornalista: Alberto Menezes
Editor: Xisto Mendonça
