DILI, STLTIMORLESTE.com – IX Governu Konstitusionál liu husi Ministeriu ba Asuntus Kombatentes Libertasaun Nasionál (MAKLN), kalendariza ona atu halo pagamentu pensaun veteranus nian bá kombatente sira hamutuk nain 600 resin iha faze dahuluk nian iha 15 Dezembru 2025.
Kombatente sira neebe atu hahu simu pensaun iha fulan ida nee mai husi sira ne’ebé mak rejistadu iha segundu rejístu tinan 2009 nian, inklui sira neebe ninia dadus pendente kedas iha primeiru rejístu 2003 no 2005.
Liu husi konferensia imprensa, Ministru ba Asuntus Kombatentes Libertasaun Nasional, Gil da Costa Monteiro “Oan Soru” esplika, sira neebe atu hetan daudaun pagamentu husi Governu iha fulan ida nee inklui grau partisipasaun (3-7), (8-14), (15-19), (20-24) ho Mártir sira neebe mak mate ho idade klosan durante funu ba libertasaun nasionál hahú husi tinan 1975 too 1999.
“Ema mate klosan nee barak liu. Maibe, agora daudaun iha ema 100 resin mak tama hotu iha pensaun neebe foin daudaun ita aplika ba. Maibe, ami hein tan iha loron hirak nee, tanba lísta nee lori ba taka sai hela, no ami halo hela kálkulu. Se ida ne’e mai hotu, hamutuk 600 resin. 600 resin nee mak sei paga iha fulan Dezembru tinan ida nee,” hatete Ministru “Oan Soru” informa liu husi konferensia imprensa iha knaar fatin Komoro, Dili, Kinta (04/12/2025).
Tuir dadus, ema sira neebe durante nee simu hela pensaun, inklui dadus sira iha segundu rejistu 2009 nian hamutuk rihun 43. Dadus ida nee inklui pensaun oin-oin mak hanesan, balu sei hetan pensaun vetaranu ho tinan 24, balu 15/19, no barak liu mak simu pensaun 8/14 ho pensaun sobrevivensia.
“No iha nee mos iha Prestasaun pekuniaria unika neebe mak hanesan ohin mensiona iha nee, hamutuk rihun 5 resin. Nee mak sei hetan mos direitu ba pretasaun pekuniaria unika nee,” relata Ministru “Oan Soru”.
Enkuantu montante osan neebe mak MACLN sei uza hodi halo pagamentu kombatente sira iha fulan ida nee nia klaran hamutuk milhaun US$ 49. Maibe, husi milhaun US$ 49 nee kotegoria hanesan brutu no likidu nee hamutuk US$ 44.294,144,12.
Jornalista: Alberto Menezes
Editor: Xisto Mendonça
