AMBENO, STLTIMORLESTE.com – Komunidade sira iha Suku Monemeko, Aldeia Oetfo, Bairru Kinat, hahu preokupa ona ho sira nia kondisaun estrada area remotas husi Usaesuit, Suku Bobokase liga suku Monemeko ba Kinat hafoin halo reabilitasaun husi kompanhia, la halo valeta no ponte, kondisaun estrada nee komesa aat ona, sei prezudika sira nia movimentu iha tempu udan.
Kestaun nee hatoo husi Armanda Teme nuudar komunidade Aldeia Oetfo, Bairru Kinat liu husi enkontru ho Provedor Provedoria Direitus Humanus no Justisa (PDHJ) Timor Leste (TL), Virgilio da Silva Guterres Lamukan, iha Sede Aldeia Oetfo, Kuarta (04/12/2025) dehan, agradese ba governu liu husi Autoridade RAEOA, hadia ona kondisaun Estrada husi Suku Bobokase Usaepsuit mai too bairru Kinat, kapas tebes iha tempu bailoron, bele fasilita movimentu komunidade ba mai, maibe hafoin udan, Estrada nee komesa aat dadaun ona, tanba kompanhia halo Estrada nee, laiha baleta kuak no barajen, ikus sei lori dezastre ba komunidade iha tempu udan.
“Ami agradese ba governu liu husi Autoridade RAEOA neebe tau matan ona ba ami nia Estrada halo luan no ateru ona, maibe dadaun nee tempu udan kondisaun Estrada nee hahu lori ameasa ba movimentu komunidade tanba bee kee estraga tiha Estrada tanba barajen no bee dalan la iha, pior liu tan, kompanhia mai kee Estrada naruk teb-tebes, fo ameasa ba komundade neebe uma halo iha Estrada leten, laiha barajen, uma barak sei monu iha tempu udan ida nee. Ami husu ba governu liu husi prezensa PDHJ iha Kinat, atu hatoo ami nia preokupasaun nee ba ukun nain sira, atu hadia Estrada tenke kompletu, realidade kompanhia mai kee deit Estrada halo luan, depois la iha bee dalan no barajen, ida nee sei lori dezastre ba ami komunidade neebe hela iha Estrada leten, tanba kee rai besik loos ho ami nia uma,” dehan nia.
Iha biban nee, Xefe Aldeia Oetfo, Daniel Suni rekomenda mos ba governu atu Estrada neebe dadaun governu halo nee, tenke kontinua liga ba too Aldeia Laokfoan tanba dadauk nee Estrada seidauk tembus too neeba.
“Iha nee mos ami preokupa ho komunidade bairru 6 maka sedauk hetan linha eletrisidade, tanba nee husu ba PDHJ nuudar instituisaun estadu neebe maka ohin mai too iha nee, atu hatoo netik ami nia preokupasaun, liu-estrada tanba kuandu iha enkontru iha sede suku Monemeko, ami tenke lao ain, balun sae kareta ba too Tono maka foin asesu transportasi ba too ami nia sede suku,” dehan nia.
Hatan ba kestaun nee, Provedor PDHJ, Virgilio da Silva Guterres Lamukan, sei hatoo informasaun no preokupasaun komundade Aldeia Oetfo ba autoridade RAEOA nomos ministeriu relevante sira atu tau matan ba preokupasaun komunidade sira nian.
“Ami sei hatoo kestaun nee ba autoridade RAEOA ho ministeriu relevantes sira iha nasional Dili neeba, tanba povu hotu-hotu tenke hetan atendementu husi governu liu husi orsamentu neebe kada ministeriu iha uma fukun Parlamentu Nasional no osan nee hetan aprovasaun ona atu atende povu nia preokupasaun,” dehan nia.
Iha biban nee nia husu nafatin ba povu atu kontinua hatoo nafatin preokupasaun neebe komunidade hasoru atu governu tau matan, tanba iha tempu kampanha, lider politiku sempre promete katak atu haree problema Estrada, eletrisidade, saude, edukasaun, ekonomia no seluk-seluk tan, wain hira ukun tiha ona, tenke kumpri sira nia promesa hirak nee.
Jornalista: Joseph Koa
Editor: Joseph Koa
