AMBENO, STLTIMORLESTE.com – Timor Leste (TL) Restaura Independensia tinan 24 ona, maibe Komunidade Aldeia Oetfo Suku Monemeko hamutuk 123 ate ohin loron seidauk hetan kartaun eleitoral, realidade sidadaun Timor oan hirak nee maka fo sira nia votus iha loron konsulta popular, maibe tanba deit sira hola malu ho sidadasun Indonezia, entaun sira sedauk iha kartaun eleitoral, tanba nee husu ba Konservatoriu Rejional Oecusse, atu halao rejistu mobile nunee, sira bele hetan sertidaun nasionementu no bilhete identidade atu hetan prosesa sira nia kartaun eleitoral.
Informasaun nee hatoo husi Xefe Aldeia Oetfo, Daniel Suni ba STL iha Bairru Kinat, Suku Monemeko, Rejiaun Administrativa Espesial Oecusse-Ambeno, Kuarta (04/12/2025) katak, iha ninia aldeia Monemeko, komunidade hamutuk 123 maka oras nee sedauk iha kartaun eleitoral,
Bilhete identidade no Sertidaun nasiomentu.
“Hau nia komunidade iha nee hamutuk 123 maka sedauk hetan kartaun eleitoral, Bilhete Idententidade nomos Sertidaun nascimentu, tanba alende sira hela iha area remotas neebe dook husi sidade, sidadaun balun hola malu ho sidadaun Indonezia nian iha tempu indonezia, sira mos tuir votasaun iha loron konsultapopular 30 Agostu 1999, maibe hafoin ukun aan, sira ate agora sedauk sai sidadaun Timor Leste (TL), balun ferik no katuas ona, ate ohin loron sedauk hetan dokumentus autentiku nuudar sidadaun ida iha nasaun ida nee, tanba nee ami husu ba Governu Autoridade liu husi Notariadu Oecusse, atu halao rejistu mobile hodi nunee sira mos bele rejistu sai sidadaun TL,” dehan nia.
Relasiona ho preokupasaun nee, Provedor Provedoria Direitus Humanus no Justisa (PDHJ) Timor Leste (TL), Virgilio da Silva Guterres Lamukan, sei enkaminha informasaun nee ba Prezidente Autoridade Rejiaun Administrativa Espesial Oecusse-Ambeno (PA-RAEOA) nomos Notariadu Oecusse.
“Relasiona ho preokupasaun nee, ami sei enkaminha informasaun nee ba PA-RAEOA ho Notariado Oecusse atu haree ba kestaun nee. Ohin Ami mai iha nee tanba deit hetan keixa husi Xefe Suku Oetfo kona ba kompanhia abandona projetu konstrusaun foun ba Pre-Eskolar Kinat neebe abandona husi kompanhia, maibe iha biban dialogu nee, ita nia komunidade sira iha nee mos hatoo problema seluk maka komunidade barak iha nee barak maka sedauk hetan kartaun eleitoral,” dehan nia.
Antes nee Diretor Konservatoriu no Notariadu rejistu civil Rejiaun Administrativa Espesial Oecusse-Ambeno, Rui Perreira dehan, sira mos iha ona planu atu halo rejistu mobile tama sai suku sira iha Oecusse maibe tanba deit transporte maka sedauk iha, entaun ate agora sedauk bele kontinua programa neebe iha tinan hirak liu ba ona halao ona.
“Ami iha ona planu atu halo rejistu mobile tama sai suku, maibe ate agora ami sedauk bele halao programa ida nee, tanba kestaun transporte maka sedauk iha, realidade kareta neebe aloka mai iha konservatoriu no notariadu Oecusse iha, kondisaun sedauk diak,” dehan nia.
Nia haktuir tan katak, durante nee kuandu halao rejistu mobile, sempre lao konjuntu husi parte saude, edukasaun, polisia no entidades sira seluk sempre lao hamutuk, maibe durante nee mos blanko original ba sertidaun nasimentu, blandu obitu nomos Bilhete identidade sedauk iha, maka programa sedauk lao.
Jornalista: Joseph Koa
Editor: Joseph Koa
