DILI, STLTIMORLESTE.com – Sekretaria Estadu ba Igualdade (SEI), Elvina Sousa Carvalho hatete, atu kriminaliza kazu insestu nee projetu boot ida.
Nia hatete, kriminaliza kazu insestu nee hanesan projetu boot ida, tanba durante nee sosiedade sivil nomos organizasaun oin oin hatoo ba SEI nomos Ministeriu Justisa (MK), atu buka dalan kriminaliza kazu insestu no fo kastigu todan ba ema neebe komete kazu.
“Kriminaliza insestu nuudar projetu boot ida karik hau bele hatete, tanba durante nee sosiedade no komunidade barak liu liu organizasaun feto sira i vitima sira mos hatoo ba SEI nomos MJ oinsa buka dalan halo nusa kriminaliza insestu nomos fo kastigu ida neebe mak todan ba iha kazu insestu,” dehan nia ba jornalista iha Hotel Timor, Sesta (05/12/2025).
Nia hatete, dala barak kazu neebe mosu iha aman ka avo balun hanoin katak sira mos iha direitu, atu bele halo violasaun seksual ba sira nia oan nomos beioan, maibe ida nee hahalok neebe labele atu halo duni no laiha toleransia ba ida nee.
Nunee mos Prezidente Rede Feto Timor Leste, Zelia Fernandes hatete, atu kriminaliza kazu insestu ida nee mak rejultadu husi kongresu nasional feto Timor Leste nia sai preokupasaun komun hahu kedas husi konferensia mai too kongresu nasional.
Jornalista: Emerenciana Pinto
Editora: Domingas Gomes
