DILI, STLTIMORLESTE.com – Unidade Patrulhamentu Maritima (UPM) halo patrulhamentu rutina hamutuk ho Unidade Informasaun Polisia Maritima Kompanha Bravo, Postu Administrativu Atabae, konsege detekta no kaptura suspeitu nain rua (2) ho inisial CM no APP, utiliza kareta pajero sport (metan) ho sapa matrikula B19-157, tula bebidas milko karong 14, golda coffee karong 11, iha oras 18.30 OTL.
Nia dehan, iha loron Kuarta (03/12/2025) Unidade Servisu Informasaun Polisia Fronteira konsege detekta no kaptura sidadaun ho bero ida, tula subar “Fugetes” kaixa boot 12, makina jhonson 14 pk ida.no obralan 27 pakotes.
Nia hatutan, iha loron 2 Dezembru tinan ida nee oras 18:30 patrulhamentu rutina husi Unidade Patrulhamentu Maritima nian detekta atividades kontra bandu balun ne’ebé fasilita husi sidadaun Timor oan sira.
“Iha momentu neeba kedas ita nia patrulhamentu husi Unidade Patrulhamentu Maritima (UPM) prende sasan bebidas hamutuk 23 kaisas inklui kareta pajero ida,” hatean Diretor Diresaun Servisu Investigasaun Kriminal (DSIK), Superintendente Polísia, João Belo dos Reis ba jornalista sira iha MI, Sesta (05/12/205).
Tuir nia, iha loron 3 Dezembru tinan ida nee oras 18:00 patrulhamentu rutinan husi informasaun husi Unidade Patrulhamentu Fronteira (UPF) mos detekta no prende fugetis kaisas boot hamutuk 12, makina jonsong ida no mos roupa obralan kaisa 27.
“Sasan neebe mak hodikalan prende iha parte palaka mak hanesan fugetes no bebidas neebe mak governu bandu atu hatama maibe ita nia sidadaun sira kontinua hatama,” nia deklara.
Nia informa, operasaun iha parte rua mak lidera, operasaun ida husi alfandega neebe involve ministériu interligadu no ida seluk husi operasaun rutina husi PNTL no mos operasaun konjunta husi F-FDTL.
Nia koalia, ekipa seguransa sira mos sei halo operasaun atu nuune bele fo hakmatek no trankilio ba komunidade sira atu tuir festeja loron Natal nian iha semana tuir mai.
Jornalista: Jeniche da Costa
Editor: Xisto Mendonça
